د مرکزي سېلو او مکروریانونو د ساتني او څارني دولتي شرکتونو ارزونه وسوه
د دولتي شرکتونو د ارزوني په دوام، د مولوي احمد جان بلال په مشرۍ د ټاکل سوي کمېټې له لوري، د مالیې وزارت اړوند د مرکزي سېلو او د مکروریانونو د ساتني او څارني دولتي شرکتونو ارزونه، د جلا غونډو په ترڅ کي ترسره سوه
په لومړۍ غونډه کي د مکروریانونو د ساتني او څارني دولتي شرکت مسؤلینو د دغه شرکت د تاریخچې، فعالیتونو، پلانونو او د اسلامي امارت له بیا حاکمیت وروسته د رامنځته سوو اصلاحاتو په تړاو معلومات وړاندي کړل او یادونه ئې وکړه، چي د اسلامي امارت له بیا حاکمیت وروسته په دغه شرکت کي د مسلکي اشخاصو ګمارني، سیسټم جوړوني او له فساد سره مبارزې ته ځانګړې پاملرنه سوې ده. همدا راز د یو منظم مالي ډېټابېس نشتون، تدارکاتي قوانین او په مالي برخه کي غیر ثابت بدلونونه د یاد شرکت له ستونزو څخه یاد سول، چي د کمېټې د غړو او کارپوهانو له لوري د یادو ستونزو د حل لپاره مناسبي لاري چاري وړاندي سوې.
په دوهمه غونډه کي د کابل مرکزي سېلو دولتي شرکت هر اړخیزه ارزونه وسوه، چي په تېرو شلو کلونو کي یاد شرکت له پامه غورځېدلی او یو ځپل سوی شرکت یاد سو؛ خو د اسلامي امارت له بیا حاکمیت وروسته نوموړي شرکت یو ځل بیا خپل لومړني فعالیتونه پیل کړل، اوسمهال له بد مالي وضعیت څخه راوتلی او د بېلابېلو ادارو سره ئې په اړوندو برخه کي قراردادونه لاسلیک کړي او په عمومي کچه هم خدمات وړاندي کوي.
د دغه شرکت له تولیداتو څخه د ګټي اخیستني په برخه کي د دولتي ادارو نه پاملرنه یوه ستونزه یاده سوه، چي د مرکزي سېلو د تولیداتو په کچه ئې منفي اغېزه کړې ده. په دې برخه کي د شرکت مسؤلینو ډاډ څرګند کړ، چي تولیدات ئې معیاري او قیمتونه ئې مناسب دي، ټول دولتي او خصوصي بنسټونه کولای سي، چي په غوره کیفیت سره په ډاډه زړه د مرکزي سېلو او د فعالو سوو ولایتي سېلوګانو له تولیداتو او خدماتو څخه ګټه واخلي.
د یادوني وړ ده، چي د کمېټې غړو او کارپوهانو د مرکزي سېلو دولتي شرکت د فعالیتونو د لا پراختیا او ښې بازار موندني په برخه کي، د شرکت له مسؤلینو سره خپل مهم نظرونه او وړاندیزونه شریک کړل.
