د ساتنې او ځانګړو عملیاتو تنفيذي قطعې له تعليمي ټولۍ څخه (۷۰) تنه قوماندانان فارغ شول
د چنګاښ ۶مه۱۴۰۵ هـ.ل
د ماليې وزارت د ساتنې او ځانګړو عملیاتو تنفيذي قطعې له تعليمي ټولۍ څخه د مرکزي او ولايتي امنيتي مفروزو او ګرځنده څارنې (۷۰) تنه قوماندانان له (۱۰) ورځني روزنيز سيمينار څخه فارغ شول.
په همدې تړاو جوړو شویو ځانګړو مراسمو کې د مالیې وزارت د ګمرکونو او عوايدو معين الحاج مفتي عبدالمتين سعيد، د ساتنې او ځانګړو عملیاتو تنفيذي قطعې عمومي قوماندان حافظ مولوي محمد نور عبيد، د ښوونې او روزنې مدير مفتي عبدالرزاق عبيده او ګڼ شمېر نورو مسئولينو ګډون کړی وو.
د ګمرکونو او عوايدو معين فارغ شويو قوماندانانو ته په خطاب کې وویل، چې کله تاسو خپلو مسئوليتونو ته ور وګرځئ تر خپلو لاس لاندې کسانو او چارو په برخه کې په حق پرېکړه کوئ، د حق پلویان اوسئ، له قوم پرستۍ، لسان پرستۍ څخه ځانونه وساتئ، په خپلو منځونو کې د اتحاد، اتفاق او د ورورولۍ فضا رامنځته کړئ، ځکه په اتحاد او اتفاق کې مو د وطن خير او ابادي ده.
ښاغلي سعيد زياته کړه، چې د يوه ښه مسئول صفات او نښې دادي، چې بايد امين وي له خيانت، فريب، چل او دوکې څخه لیرې وي، مسئول بايد د نفس تابع نه وي، مسئول بايد شجاع وي د ښې تجربې او زکاوت خاوند وي.
غونډه د تصديق پاڼو په وېشلو او د خیر دعا په ویلو سره پای ته ورسېده.
د يادونې وړ ده، چې د ساتنې او ځانګړو عملیاتو تنفيذي قطعه د ماليې وزارت اړوند تاسيساتو او سوداګریزو توکو د ساتنې سربېره، د قاچاقي توکو، ملي عوایدو له تېښتې او ګمرکي سرغړونو څخه د مخنیوي مسئولیت په غاړه لري.
