د روڼتيا نړيوال سازمان د راپور په تړاو د ماليې وزارت اعلاميه
د روڼتيا نړيوال سازمان په خپل خپاره سوي راپور کي ويلي: چي افغانستان د ا.ا.ا. تر حاکميت لاندي په ( ۲۰۲۲ ) ميلادي کال کي، د فساد سره په مبارزه کي د روڼتيا ( ۲۴ ) مثبتي نومرې ترلاسه کړي او د ( ۱۸۰ ) هيوادونو په نوملړ کي ئې ( ۱۵۰ ) ځای خپل کړی دئ، په داسي حال کي، چي د ياد سازمان په نزد د ( ۲۰۱۷ ) ميلادي کال راهيسي (۹۰ ) سلنه هيوادونو د فساد په منځه وړلو کي هيڅ کوم پرمختګ کړی نه دئ.
دا چي په نوملړکي افغانستان نسبت پخوا ته ښه پرمختګ کړی دئ او د ( ۱۷۴ ) مقام څخه و (۱۵۰ ) ته راکښته سوی؛ خو بيا هم د ماليې وزارت په افغانستان کي د روڼتيا او فساد سره د مبارزې په تړاو د ياد نړيوال سازمان خپاره سوي ارقام نيمګړي بولي او په دې برخه کي د دقيقي بيا کتني غوښتنه کوي.
دا چي د ماليې وزارت له لوري د نظام په ټولو مالي برخو کي روڼتيا رامنځته سوې او فساد محوه سوی، چي ورسره د ملي عوايدو کچه ورځ تر بلي د لوړېدو په حال کي ده او د هيواد اقتصاد مثبت خوځښت کړی، چي بېلګه ئې په دې وروستيو کي د نړيوال بانک له لوري هم وړاندي سوه؛ نو د روڼتيا نړيوال سازمان څخه هم غوښتنه کوو؛ تر څو په افغانستان کي موجوده واقيعتونو ته په کتو سم معلومات خپاره کړي او نړۍ ته د افغانستان رښتينی روښانه انځور وړاندي کړي.
د ماليې وزارت د روڼتيا پر نړيوال سازمان او ورته نورو سازمانونو غږ کوي؛ تر څو د نامعلومو سرچينو څخه د ناسمو معلوماتو د اخيستلو پر ځای راسي او له نږدې څخه په افغانستان کي د فساد سره د مبارزې په تړاو څېړنه وکړي او کره معلوماتو ته د نړيوالو اصولو سره سم انعکاس ورکړي، چي په دې برخه کي موږ هري اصولي او لازمي همکاری ته هم اماده يوو.
