د روان کال د مرغومي په میاشت کي د هیواد ګمرکي چارو (۱۵،۷) سلنه پرمختګ کړی دئ!
د سلواغې ۲۴مه ۱۴۰۳هـ.ل
د مالیې وزارت د ګمرکونو او عوایدو معین الحاج مفتي عبدالمتین سعید په مشرۍ د روان (۱۴۰۳هـ.ل) کال د مرغومي په میاشت کي په ګمرکونو کي د ترسره سويو چارو د تخنیکي ارزوني ناسته پر لیکه او حضوري بڼه وسوه.
په پیل کي د ګمرکونو او عوایدو معین، د ګمرکي عوایدو د زیاتوالي، د مسئولینو او کارکوونکو ترمنځ د تجربو په شریکولو، د کارکوونکو د وړتیا لوړولو، د قاچاقي او ممنوعه توکو د مخنیوي، په دقیق ډول د خالي بار وړونکو موټرو د وزن معلومولو او د یو شمېر نورو موضوعاتو په اړه د ولايتي ګمرکونو مسئولیتو ته لازمي سپارښتني وکړې.
ورپسې د ګمرکونو لوی ریاست د پلان جوړوني، پالیسۍ، څارني او ارزوني ریاست له لوري د روان (۱۴۰۳هـ.ل) کال د مرغومي په میاشت کي په ګمرکونو کي د تر سره سويو فعالیتونو ټولیز راپور وړاندي سو. په یاده موده کي د عوایدو د راټولېدو، د هیواد په ګمرکونو کي د ترسره سوي سوداګرۍ، د وارداتي توکو د ګمرکي ارزښت او د سوداګریزو محمولو د شمېر او ثبت سوي وزن په اړه بشپړ معلومات وړاندي سول، چي له مخي ئې د تېر کال د همدې مودې په پرتله، د ګمرکونو چاري (۱۵،۷) سلنه مثبتي وښودل سوې.
د وړاندي سوي راپور په تړاو هر اړخیز تخنیکي بحثونه وسول او د چارو د لا پرمختګ په موخه د ولایتي ګمرکونو د مسئولینو ستونزي او وړاندیزونه واورېدل سول، چي د رهبرۍ له لوري د ستونزو د حل ډاډ ورکړل سو او ورسره اړیني سپارښتني هم شریکي سوې.
