د روان کال د مرغومي په میاشت کي د هیواد د سترو ګمرکونو چاري د تېر کال همدې مودې په پرتله غوره و ارزول سوې!
د ګمرکونو لوی رئیس الحاج مفتي عبدالمتین سعید په مشرۍ، د روان مالي کال د مرغومې په میاشت کي د ګمرکونو د وضعیت ارزوني په موخه تخنیکي ناسته د ګمرکونو او عوایدو معینیت د غونډو په تالار کي جوړه سوه.
په دې ناسته کي د ګمرکونو لوی ریاست مرستیالانو، یو شمېر رئیسانو او د ویډیو کنفرانس له لاري د ولایتي ګمرکونو مسؤلینو ګډون کړی وو.
په پیل کي د ګمرکونو لوی رئیس ټولو ګډونوالو ته د ښه راغلاست تر څنګ د یوې کیلي موټرو د ثبت او محصول پروسې، په ګمرکونو کي له ټاکلي وخت څخه د زیات کار کولو، ضبطي توکو، له هیواد څخه د بېرته تلونکو کانټینرونو او یو شمېر نورو موضوعاتو په اړه د ولایتي ګمرکونو مسؤلینو ته لازمي سپارښتني وکړې.
ور پسې د ګمرکونو لوی ریاست د پلان جوړوني، پالیسۍ، څارني او ارزوني رئیس ښاغلي محمد وسیم عثمان له لوري د مرغومي په میاشت کي په ګمرکونو کي د تر سره سوو فعالیتونو په تړاو ټولیز راپور وړاندي سو او همداراز په دې موده کي د عوایدو راټولېدو، د هیواد په ټولو ګمرکونو کي د تر سره سوي سوداګرۍ، د وارداتي توکو د ګمرکي ارزښت او د سوداګریزو محمولو د شمېر او ثبت سوي وزن په اړه ګډونوالو ته بشپړ معلومات وړاندي کړل، چي په دې راپور کي د هیواد د سترو ګمرکونو چاري د تېر کال د همدې مودې او د روان کال د لېندۍ میاشتې په پرتله مثبتي ښودل سوي دي.
همدا شان ګډونوالو د مرغومي میاشتي د راپور په اړه هر اړخیز بحث وکړ او د چارو د لا ښه والي لپاره ئې د ولایتي ګمرکونو مسؤلینو ته لازمي سلا مشورې ورکړې.
د ولایتي ګمرکونو مسؤلینو هم په خپل وار سره په خپلو اړوندو کاري برخو کي د شته ستونزو یادونه وکړه، چي د ګمرکونو لوی ریاست د رهبرۍ له لوري ئې د ژر تر ژره حل کېدو ډاډ ورکړل سو.
د یادوني وړ ده، چي د ګمرکونو لوی ریاست په میاشتني، ربعوار او کلني ډول د ټولو ګمرکونو تخنیکي ارزونه کوي، څو شته ستونزو ته پر خپل وخت رسېدنه وسي.
