د خوست په ګمرک کي د (۱۰۵) میلیونه افغانیو په ارزښت د موټرونو تم ځای جوړ سو!
د مالیې وزارت له لوري د هیواد په ګمرکونو کي د بېلابېلو پراختیایي پروژو د عملي کولو په دوام؛ د دغه وزارت د ګمرکونو لوی ریاست د (۱۰۵) میلیونه افغانیو په ارزښت د خوست په محصولي ګمرک کي د موټرونو له پاره معیاري تم ځای جوړ او ګټي اخیستني ته وسپاره.
د موټرونو دغه تم ځای په (۱۴) جریبه ځمکه کي جوړ سوی او پر یوه وخت د (۳۰۰) بار وړونکو موټرونو د درېدو وړتیا لري.
د موټرونو په دې تم ځای کي په اساسي ډول کانګرېټ اچول سوی، چي د اور وژني او د برېښنا سیسټمونه هم پکښې فعاله سوي دي.
د دغه پروژې ټول لګښت د مالیې وزارت له پراختیایي بودیجې څخه ورکول سوی دئ او رغنیزي چاري ئې هم د یوه افغاني شرکت له لوري په (۸) میاشتو کي بشپړي سوي دي.
د یاد تم ځای په جوړېدو سره موټر چلوونکو، سوداګرو او د خوست ګمرک کارکوونکو ته په بېلابېلو برخو کي ګڼي اسانتیاوي برابري سوي دي.
