د جلال اباد، تورخم ګمرک او ننګرهار ولایت له مستوفیت څخه د مالیې وزارت سرپرست لیدنه
د مالیې وزارت سرپرست ښاغلي محمد خالد پاینده، د کب میاشتې په ۶ مه نېټه د دې وزارت له یو شمېر لوړ رتبه چارواکو په ملتیا ننګرهار ولایت ته سفر وکړ او د جلال اباد او تورخم ګمرک همداشان د دې ولایت له مستوفیت څخه لیدنه وکړه.
په دې سفر کې د ننګرهار ولایت د ګمرک او مستوفیت کارکوونکو د مالیې وزارت سرپرست ته؛ ملي سوداګرو ته د اسانتیاوو رامنځته کولو او په چټکه توګه د سوداګریزو محمولو د پړاوونو ترسره کولو په برخه کې د تورخم ګمرک د سېمې پراخيدو، د تورخم ګمرک د پارکینګ پراخېدو، د ډیجیټلي تلو د فعاله ساتلو، د ننګرهار په ګمرک کې د تجهیزاتو او تاسیساتو د کمښت، د تورخم ګمرک په دخولي او خروجي دروازو کې د معیاري او کافي کمرو نه شتون، د مستوفیت او ګمرک د کارکوونکو د ټیټې تخصصي او مسلکي وړتیا او مالیاتو راټولېدو د چارو په برخه کې د عامه پوهاوي ټیټې کچې په تړاو خپلې ستونزې او وړاندیزونه وړاندې او ترڅنګ یې خپلې دندې او مکلفیتونه هم روښانه کړل.
د مالیې وزارت سرپرست، د دوی د ستونزو له اورېدو وروسته اړوندو مسؤلینو ته لازم هدایات ورکړل.
