د بودیجې د اجرا، تخصیصاتو (مالي پلان) او (م ۱۶) په تړاو د ۲۱ باب، عادي بودیجې لارښود ورکشاپ ترسره سو
د ملي بودجې لوی ریاست د مالیي وزارت په خیبر هال کي د بودیجې د ثبت او اجرا، تخصیصاتو (مالي پلان) او (م ۱۶) په تړاو د ۲۱ باب، عادي بودیجې تر عنوان لاندي د افغانستان اسلامي امارت د وزارتونو او خپلواکو ادارو مالي او بودیجې برخي مسئولینو ته لارښود ورکشاپ پیل کړ.
د پروګرام په پیل کي د ملي بودجې د پلان او ریفورم رئیس پوهنمل غلام عمر عبدالله د عادي بودیجې په ځینو فصلونو کي د نویو بدلونونو او د معاشاتو د فصلونو په ۲۱م باب کي د پروژې رامنځ ته کولو، اسانتیاوو برابرۍ او د معاشاتو د اجرا لپاره د ټولو فصلونو د ثبتولو او همدارنګه د کره راپور ورکوني او د معاشونو د لګښتونو د کنټرول په اړه خبري وکړې او ګډونوالو ته یې د همدغه نوي ریفورم د ارزښت په تړاو بشپړ معلومات وړاندي کړل.
ورپسې هغه نوي فورمې او کوډونه چي د ملي بودجې او د خزاینو لویو ریاستونو په سیسټمونو کي رامنځته سوي دي، د ملي بودجې د اجرا برخي کارپوه محترم فردین احمدي او د خزاینو لوی ریاست د افمیس سیسټم د پراختیا مسئول قاري ریاض احمد له لوري تشریح سول.
د پروګرام په پای کې د ملي بودجې او خزاینو لویو ریاستونو د مسئولینو له خوا د ګډونوالو پوښتنو ته ډاډمن ځوابونه ورکړل سول.
