د باختر افغان الوتنې دولتي شرکت د مدیره پلاوي لومړنۍ ناسته وشوه
د مالیې وزارت د مالي او اداري او د دې شرکت د مدیره پلاوي رئیس سید احسان طاهري په مشرۍ، د باختر افغان الوتنې دولتي شرکت د مدیره پلاوي لومړنۍ ناسته د اداري معینیت د کنفرانسونو په صالون کې وشوه.
په پیل کې د افغان باختر الوتنې دولتي شرکت رئیس احمد مسلم خُرم، له ۴۰ کاله بدلون وروسته د دولتي شرکت په توګه د باختر هوایي شرکت بیا فعالیدو، د دې شرکت د تشکیلاتي جوړښت، بودیجې، تدارکاتي پلان، د بشري سرچینو پالیسۍ او کړنلارو، معلوماتي ټکنالوژۍ او د شرکت د معاشونو سکیل په تړاو مشخصو وړاندیزونو او نورو بنیادي او اړینو موضوعاتو په هکله د ناستې ګډونوالو ته معلومات وړاندې او زیاته یې کړه، چې د باختر شرکت د ودې او د ښو الوتنو او په هېواد کې له نورو خصوصي شرکتونو سره د سیالۍ په برخه کې مډرن او تطبیقي پروګرامونه په پام کې لري.
ورپسې د دې شرکت مدیره پلاوي رئیس سید احسان طاهري، د شرکت د مدیره پلاوي د هر یوه غړي له نظرونو وروسته د بحث شویو موضوعاتو په تړاو مشترکې او اړینې پرېکړې وکړې.
