د افغانستان د مسلکي محاسبینو(CPA) ریاست د بورډ لومړنۍ ناسته ترسره سوه!
د افغانستان د مسلکي محاسبینو(CPA) ریاست، د مسلکي محاسبینو د روزني او ساتني، افرادو او شرکتونو ته د معیاري، منل سوو محاسبوي جوازونو د ورکولو او په ټوله کي په ملي کچه، مسلکي محاسبې ته د ودي ورکولو په موخه چاري ترسره کوي، چي ورسره په دولتي، نیمه دولتي او خصوصي ادارو کي مسلکي محاسبوي چاري او مالي روڼتیا رامنځته کېږي.
د اسلامي امارت د بیا حاکمیت را وروسته د دغه ریاست د بورډ لومړنۍ ناسته د مالیې وزارت د خزاینو د لوی رئیس، نصرت الله محمود په مشرۍ او د لوړو زده کړو او اقتصاد وزارتونو، د افغانستان بانک او سوداګرۍ خوني د مالي مسؤلینو او د یاد ریاست د مسلکي غړو په ګډون، ترسره سوه.
په دغه ناسته کي د مسلکي محاسبینو(CPA) ریاست د چارو د بیا پیل پر څرنګوالي، د مسلکي تشکیل پر غښتلتیا، د کمپنیو او شرکتونو د ارزوني پر څرنګوالي او د عملي اجراآتو په موخه د کړنلاري د لارښود پر ترتيبولو هر اړخیز بحثونه وسول؛ د بورډ د غړو له لوري د چارو د ښه پرمختګ په موخه، پر یو شمېر موضوعاتو هوکړي وسوې او ځیني مسایل د دقیقي ارزوني په موخه د (CPA) ریاست ته وسپارل سول؛ ترڅو وروستی راپور ئې د بورډ راتلونکي غونډي ته وړاندي کړي.
