د اسیا پراختیایې بانک له افغانستان سره ۱۸ میلیونه امریکایې ډالر مرسته وکړه
د اسیا پراختیایې بانک ۱۸ میلیونه امریکایې ډالر د لړم میاشتې په ۸ مه نېټه په افغانستان کې د کرنې سکټور ښه والي او د هیواد د شمال ختیځو ولایتونو د کرنې ښه والي په موخه د افغانستان لپاره تصویب او مرسته وکړه.
د یادې مرستې هوکړه لیک د لړم میاشتې په ۱۸ مه نېټه د مالیې وزارت نوماند وزیر او سرپرست ښاغلي عبدالهادي ارغندیوال او د افغانستان لپاره د اسیا پراختیایې بانک رئیس ښاغلي نرندرا سنګرو له لوري لاسلیک شو.
یاده بودیجه د پنج – امو سیند حوضې د فعالیتونو پراختیا لپاره ده چې د سیند اوبو ته د بدخشان، کندز و تخار ولایتونو د وګړو لاسرسی زیاتوي. همداشان یادې پیسې به له خپلې کچې د اوبو زیاتوالي د مدیریت او مخنیوي او له دې برخې د رامنځته کیدونکو خطرونو په برخه کې ولګول شي.
همداشان د سنمګان، بغلان، بامیان، پنجشیر، پروان او میدان وردګو ولایتونو لپاره مرسته کوي چې یادو اوبو ته لاسرسی پیدا کړي. د دې تر څنګ یاده اضافي بودیجه د ځنګلونو زیاتوالي، د ۱۰۰۰۰ نه تر ۲۷،۷۶۰ کرنیزې ځمکې د ساتنې او ملاتړ، د فزیکي بنسټونو جوړولو، د ځنګلونو بیا جوړونې، د امو سیند په خوا کې کلیو او بانډو ته د اوبو رسونې، په هغو حوزو کې چې اوبه زیاتیږي د اوبو منابعو د پروګرامونو جوړول او نورو اړوندو برخو کې به ولګول شي.
د پنج – امو سیند حوزه د غنمو، وریجو، سبزیو او میوه جاتو د تولید مرکز دی. تمه ده چې په سېمه کې د کرنیزو محصولاتو زیاتوالی د خوړو مصئونیت او په کلیو کې د سرانه عوایدو په زیاتوالي کې مرسته وکړي.
د مالیې وزارت نوماند وزیر او سرپرست ښاغلي عبدالهادي ارغندیوال وویل:" مالیې وزارت د افغانستان اسلامي جمهوریت په استازیتوب د پنچ – امو سیند له اوبو څخه د ګټې اخیستنې او غوره مدیریت همداشان د هیواد په شمال ختیځو ولایتونو کې د کرنیزو محصولاتو د زیاتوالي په برخه کې د اسیا پراختیایې بانک له مرستو څخه مننه کوي. هیله لرم چې د اوبو د چارو تنظیم ملي اداره د اسیا پراختیایې بانک له دې مرستې څخه ښه ګټه واخلي څو د بزګرو د کرنیزو محصولاتو زیاتوالي او د ژوند ښه لیدو په برخه کې ګټور واقع شي. هیله لرم چې په راتلونکي کې د اسیا پراختیایې بانک مرستې په دې برخه کې دوام وکړي."
د افغانستان لپاره د اسیا پراختیایې بانک رئیس ښاغلي نرندرا سنګرو وویل:" په افغانستان کې د کرنیزو محصولاتو زیاتوالی کولی شي چې د خوړو خوندیتوب او په کلیو کې د سرانه عاید د زیاتوالي په برخه کې مرسته وکړي." ښاغلي نرندرا سنګرو زیاته کړه:" له یادې پروژې سره اضافي مرسته کولی شي چې د کرنیزو ځمکو لپاره د اوبو کچې ښه والي او زیاتوالي همداشان د کلیو او بانډو خلکو لپاره د لا زیاتو کاري فرصتونو برابرولو له لارې افغانستان سره د کووید- ۱۹ (کرونا) وضعیت ښه والي کې مرسته وکړي."
د اسیا پراختیایې بانک د پنج – امو سیند حوزې پروژه د ۲۰۱۶ په اکتوبر کې د ۲۶ میلیونه امریکایې ډالرو او د اروپایې ټولنې د ۵۰ میلیونه امریکایې ډالرو د مدیریت په جوړولو سره تصویب کړه. یاده پروژه د اصلي، فرعي او درېیمه درجه کانالونو په ګډون د اوبو لګونې بنسټونو د بیا رغونې او ښه والي کې مرسته کوي.
یاده پروژه د سیلابونو پر وړاندې د اوبو لګونې سیستم د ساتنې مدیریت او د اوبو د پای برخه کې د مصرونکو په ځانګړی ډول د وچکالۍ په موسم کې د اوبو ویش زیاتوي. د دې تر څنګ د اقلیمي بدلونونو په اړه د ملګرو ملتونو سازمان کنوانسیون چوکاټ لاندې اقلیمي بدلونونو سره سم د اصلي اړتیاو لپاره ځواب ویونکی ده.
یاده پروژه د اوبو بنسټونو څخه د ګټې اخیستنې او ساتنې لپاره د اوبو ګټې اخیستونکو له وړتیا، د اوبو لګونې انجمن او د اړوندو دولتي سازمانونو څخه ملاتړ کوي. د دې تر څنګ د عملي روزني له لارې د نمایشي طرحو څخه په ګټې اخیستنې سره د بزګرو مهارتونه زیاتوي.
