ګمرکونو او عوایدو معین په خوست ولایت کي له یو شمېر ملي سوداګرو سره وکتل
د مالیې وزارت د ګمرکونو او عوایدو معین الحاج ملا محمد ناصر اخند، تېره ورځ خوست ولایت ته د یو رسمي سفر په لړ کي د یاد ولایت د ګمرک په ریاست کي له یو شمېر ملي سوداګرو سره، چي د غلام خان بندر له لارې سوداګري کوي، وکتل.
په دغه کتنه کې چي د ګمرکونو لوي ریاست سرپرست، تخنیکي او حمایوي مرستیال خانزاده عبدالله او د خوست ولایت د ګمرک رئیس هم ګډون درلود، په پیل کي سوداګرو په ګمرکونو کي د وروستیو اصلاحاتو او اسانتیاوو راوستلو له امله د مالیې وزارت له رهبرۍ څخه مننه وکړه او شته ستونزي او وړاندیزونه یې ورسره شریک کړل.
د ګمرکونو او عوایدو معین له یادو سوداګرو سره ژمنه وکړه، چي دوی ته به په سوداګریزو چارو کي لا ډېري اسانتیاوي رامنځته کوي او شته امکاناتو ته په کتو به د دوی ټولو ستونزو ته پر وخت رسېدنه کیږي.
د ناستې په پای کې دواړو لوریو یو بل ته په اړوندو چارو کې د هر اړخیزو همکاریو او اسانتیاوو برابرولو پوره ډاډ ورکړ.
