د ګمرکونو د مالي آمرینو او د ولایتونو د مستوفیتونو ترمنځ د لا زیاتې همغږۍ په موخه ناسته وشوه
د وږې۴ مه۱۴۰۵ هـ.ل
د ګمرکونو د مالي آمرینو او د ولایتونو د مستوفیتونو ترمنځ د لا زیاتې همغږۍ په موخه د مالیې وزارت په خیبرهال کې ناسته وشوه.
په دې ناسته کې مالي معین حاجي عبدالقدیر احمد، د ګمرکونو عمومي رئیس مولوي محمد حامد احمد، د عوایدو عمومي رئیس مولوي سفر محمد سحر، د خزاینو عمومي ریاست مرستیال بلال احمد قریشي او د ګمرکونو او ولایتونو د مستوفیتونو مالي آمرینو ګډون کړی وو.
د مالیې وزارت مالي معین د دې ناستې په پرانیستې وینا کې وویل، چې د نن ورځې ناسته د مالیې وزارت اړوندو ادارو ترمنځ د لا زیاتې همغږۍ په موخه جوړه شوې ده. نوموړي د ګمرکونو او ولایتونو د مستوفیتونو له مالي آمرینو څخه وغوښتل، چې له دې فرصت څخه په ګټې اخیستنې سره هڅه وکړي، د خپلو مسئولیتونو په اړه پوهاوی ترلاسه کړي، شته ستونزې حل کړي او د بیت المال د ساتنې په برخه کې لا زیاتې هڅې وکړي.
د ګمرکونو عمومي رئیس وویل، چې له دغې ناستې څخه په ګټې اخیستنې سره هڅه وکړئ، چې د بودیجې اصولنامه په سمه توګه پلې کړئ او د خپلو ادارو ترمنځ شته ستونزې حل کړئ؛ ترڅو هم په چارو کې د ځنډ او خنډ مخه ونیسئ او هم خپلې عوایدي موخې ته ورسېږئ. د عوایدو عمومي رئیس د دې ناستې له جوړوونکو څخه د مننې ترڅنګ وویل، چې مستوفیتونه او ګمرکونه په ولایتونو کې د مالیې وزارت استازولۍ دي. تاسو د مالیې وزارت د استازو په توګه باید خپل مسئولیت درک او د خپلو مسئولیتونو په اړه پوره پوهاوی ترلاسه کړئ. په خپل ځان کې د همغږۍ روحیه پیاوړې کړئ او د همغږۍ په لا پیاوړتیا سره خپلې ستونزې حل کړئ.
د مالیې وزارت د خزاینو عمومي ریاست مرستیال د عامه اقتصاد، عامه عوایدو او عامه لګښتونو په اړه معلومات وړاندې کړل او زیاته یې کړه، چې تاسو د مالي آمرینو په توګه باید مالي احکام، اصول او مقررات په سمه توګه پلي او د ولایتي ادارو لګښتونه مدیریت کړئ، څو لګښتونه د عوایدو له کچې څخه زیات نه شي.
په پای کې د شته ستونزو د حللارو په اړه آزاد بحث وشو او ناسته د خیر دعایې په ویلو سره پای ته ورسېده.
