د اداري معینیت د رهبرۍ ناسته کې پر مهمو موضوعاتو خبرې وشوې
د زمري۱۴مه ۱۴۰۵ هـ.ل
د مالیې وزارت د اداري معین مولوي دوست محمد مخلص په مشرۍ، په (۱۴۴۸) هـ.ق کال کې د اداري معینیت د رهبرۍ لومړۍ ناسته د اړوندو رئیسانو په ګډون د دغه معینیت د غونډو په تالار کې وشوه.
په دغه ناسته کې له اجنډا سره سم، د معینیت اړوندو ریاستونو او خپلواکو آمریتونو د قانون/کړنلاري د ترتیب، د وزارت د برېښنایي نظامونو(سیسټمونو) د لا پراختیا، د امارتي املاکو د قراردادونو د پروسې د برېښنایي کولو، د بېرونیو ناستو میاشتني راپور د شریکولو، د اوسپنې ویلې کولو شرکتونو د مقروضیتونو، د امارتي املاکو د جایدادونو د لنډ مهاله قراردادونو (د کرایو تثبیت) او ځینو نورو موضوعاتو په اړه بحثونه او لازمې پرېکړې وشوې.
همداراز اړوندو ریاستونو شته ستونزې او وړاندیزونه هم شریک کړل، چې د رهبرۍ له لوري ورته د پر وخت رسېدو ډاډ ورکړل شو.
د یادونې وړ ده، چې د مالیې وزارت اداري معینیت د رهبرۍ ناستې د چارو د لا ښه والي او اغېزمنتوب په موخه ترسره کېږي، چې دغه لړۍ به په راتلونکي کې هم دوام ومومي.
