د کیفیت کنټرول مسلکي کولو روزنیز پروګرام فارغانو ته تصدیق پاڼي ورکول سوې!
د وږي۲۴مه ۱۴۰۴ هـ.ل
د مالیې وزارت د کارکوونکو چارو ریاست د بندرونو د کیفیت کنټرول ریاست کارکوونکو ته، چي د کیفیت کنټرول مسلکي کولو له پروګرام څخه فارغ سوي ول د یو لړ مراسمو په ترڅ کي تصدیق پاڼي ووېشلې.
په دې مراسمو کي د کیفیت کنټرول رئیس قاري محمد ابراهیم خلیل، د روزني او ظرفیت لوړولو آمر مفتي عبدالوهاب عابد او یو شمېر نورو مسئولینو ګډون کړی وو.
د روزني او ظرفیت لوړولو آمر وویل، چي له ښوونکو څخه د دوی د صادقانه تدریس او د عوایدو او ګمرکونو ملي اکاډمۍ له ریاست څخه د اسانتیاوو د برابرولو له کبله مننه کوو او ګډونوالو ته ئې وویل، چي تاسو په ولایتونو کي د مالیې وزارت استازي یاست. هڅه وکړئ هغه پوهه او مهارتونه چي تاسو ترلاسه کړي خلکو ته د غوره خدماتو په وړاندي کولو او د بې کیفیته توکو په مخینوي کي وکاروئ.
د کیفیت کنټرول رئیس وویل، چي تاسو د اسلامي امارت د استازو په توګه خپل مسئولیت په ښه توګه ترسره او د معتبرو معیارونو په کارولو سره د نقلیه وسایطو، چاپېریال او د خلکو د روغتیا له پاره د بدو پایلو مخنیوی وکړئ. دا نه یوازي د کیفیت کنټرول یو دقیق نظام رامنځته کوي؛ بلکي د مصرف کوونکو ملاتړ او د بیت المال ساتنه هم له ځان سره لري.
په پاي کي له روزنیز پروګرام څخه فارغ سویو کسانو ته تصدیق پاڼي ووېشل سوې او مراسم د خیر په دعا سره پای ورسېدل.
