د مرکزي زون مستوفیت د ۵۰ تنو نویو ګمارل سویو کارکونکو له پاره په اماراتي ادارو کي د کابردۍ مدیریت روزنیز پروګرام ترسره سو!
د زمري ۱۱مه ۱۴۰۴هـ.ل
د مالیې وزارت د کارکوونکو چارو ریاست د مرکزي زون د مستوفیانو ۵۰ تنو نویو ګمارل سویو کارکوونکو له پاره په اماراتي په ادارو کي د کاربردۍ مدیریت روزنیز پروګرام ترسره کړ.
په همدې مناسبت جوړه سوې غونده کي، چي د دغه وزارت د اداري معنیت د کنفرانسونو په تالار کي جوړه سوې وه، اداري معین مولوي دوست محمد مخلص، د دعوت او ارشاد رئیس مولوي عبدالهادي سیف الخالد او د استخدام آمر مفتي نیاز محمد منصور پکښې ګډون کړی وو.
د استخدام آمر په خپله پرانیستې وينا کي وویل، چي دا پروګرام ستاسو د وړتیا لوړولو له پاره جوړ سوی دئ. په دې پروګرام کي، تاسو به په عملي توګه کارونه زده کوئ. عملي کارونه تاسو ته اجازه درکوي، چي د مفاهیمو ژوره پوهه ولرئ او د اصلي دندو ترسره کولو له پاره اړین مهارتونه زده کړئ، چي ستاسو سره به د دندو په ترسره کولو کي مرسته وکړي.
اداري معین په خپلو خبرو کي وویل، "د خپلو مسلکي مهارتونو د پراختیا له پاره له تر لاسه سوي فرصت څخه ګټه پورته کړئ. د غوره خدماتو وړاندي کولو له پاره د مسلکي پوهي او مهارتونو ترلاسه کول د ادارې له خورا اړینو اړتیاوو څخه دئ. نوموړي یادونه وکړه چې هر هغه څه، چي زده کوئ، نورو ته ئې هم انتقال کړئ.
د دعوت او ارشاد رئیس وویل، "د خپلو آمرینو څخه اطاعت وکړئ او په خپلو دندو کي غفلت مه کوئ. الهی فرامین تطبیق کړئ او د حلالي روزۍ تر لاسه کولو له پاره هڅه وکړئ. له خلکو سره ښه چلند وکړئ او خپل ځانونه د اسلام د پیغمبر له سنتو سره سم برابر کړئ.
د یادوني وړ ده، چي دا روزنیز پروګرام به (۱۰) ورځي دوام وکړي، چي په کښې به پلان جوړونه،ګزارش لیکل، مکتوب لیکل، استعلام او وړاندیز لیکنه، خبري او اړیکي، د بشري سرچینو مدیریت، ستراتیژیک مدیریت او نور مهم او اړوند موضوعات ګډونوالو ته تشرېح او روزنه ورکړل سي.
