د مالیې وزارت د دعوت او ارشاد ریاست د دغه وزارت د مسئولینو له پاره د همغږۍ غونډه ترسره کړه!
د زمري ۵ مه ۱۴۰۴هـ.ل
د مالیې وزارت د دعوت او ارشاد ریاست، د عالیقدر امیرالمؤمنین (حفظه الله) د (۲۳/۰۵/۱۴۴۶) نېټې او (۳۵۴/۲۶۲۴) فرمان او د دعوت او ارشاد پلاوي د لسمي غونډي د پرېکړي پر بنسټ، د دې وزارت د مرکزي ریاستونو د اداري او اجرائیوي مدیرانو او آمرینو له پاره د "راز ساتني" په تړاو اصلاحي غونډه وکړه.
په دې غونډه کي د استخباراتو لوی ریاست د دعوت او ارشاد رئیس مفتي محمود الحسن عزیزي، د مالیې وزارت د دعوت او ارشاد رئیس مولوي عبدالهادي سیف الخالد، د دعوت او ارشاد ریاست د ولایتي او مرکزي اداراو د همغږۍ آمر مولوي وصیف احمد احمدي او یو شمیر مسئولینو ګډون کړی وو.
د دعوت او ارشاد ریاست د ولایتي او مرکزي ادارو د همغږۍ آمر په دې غونډه کي وویل، چي د دې غونډي د ترسره کولو موخه د امانت په توګه د رازونو ساتل، له غفلت څخه ډډه کول او د افغانستان د اسلامي امارت د مشرتابه د حکم پلي کول دي، هغه وویل، چي د راز له ساتلو سره خپلمنځي باور زیاتېږي او اداري خطرونه را کمېږي.
د استخباراتو د لوی ریاست د دعوت او او ارشاد رئیس په خپله وینا کي وویل، چي د رازونو ساتل د حکومتولۍ یو له اساسي اصولو او تر ټولو مهمو اخلاقي فضایلو څخه ګڼل کېږي. د دولتي رازونو ساتل د ملي امنیت، د عمومی باور زیاتولو، له فساد څخه د مخنیوي، د قوانینو مراعتول او د حکومت په اعتبار ساتلو کي مرسته کوي. د راز پاشل د منفي لاسوهني او اداري ګډوډۍ له پاره لاره هواروي. د امیرالمؤمنین (حفظه الله) د فرمان پر بنسټ، رازونه باید وساتل سي او د دې نظام د بقا له پاره په اخلاص سره خدمت وکړو.
د مالیې وزارت د دعوت او ارشاد رئیس له ګډونوالو څخه مننه وکړه او د اسلامي امارت د مشرتابه د فرمان په پلي کولو کي ئې د هغوی د لا زیاتي همکارۍ غوښتنه وکړه.
