د کندهار په ګمرک کي د (۵۰۰۰) کیلو ګرامه انساني طبي درملو له قاچاق څخه مخنیوی وسو!
د کندهار ګمرک کارکوونکو په یوې وارداتي سوداګریزه محموله کي، چي پرچون توکي پکښې بار ول د (۵۰۰۰) کیلو ګرامه په اندازه انساني طبي درمل په ډېر مهارت سره ځای پر ځای سوي ول، له قاچاق څخه مخنیوی وکړ.
همدا شان د ګمرکونو لوی ریاست د ګرځنده څارني کارکوونکو تېره اوونۍ د ننګرهار، نیمروز، کندهار او هرات ولایتونو په بېلابېلو سېمو کې ګڼ شمېر قاچاقي توکي نیولي دي، چي قاچاق کوونکو غوښتل په پټه ئې افغانستان ته راوړي.
په دې نیول سویو توکو کي (۱۸۵۵) کیلو ګرامه انساني طبي درمل، (۴۳۶۸) کیلو ګرامه چاکلېټ، (۸۵۰۵) کیلو ګرامه روميان، (۴۷۳) کیلو ګرامه غوړي، (۴۲۰) کیلو ګرامه شیریني باب، (۲۲۰) کارټنه د قیلون ذایقه او (۱۰) کارټنه پروټین شامل دي.
