د مالیې وزارت د ګمرکونو او عوایدو معینیت د شکایتونو اورېدلو ریاست لپاره نوی رئیس معرفي سو
د ګمرکونو او عوایدو محترم معین ښاغلي ملا عبدالقاهر «ادریس» په هغه غونډه کي، چي د ګمرکونو محترم رئیس صاحب، د عوایدو لوی ریاست مرستیالانو، رئیسانو او آمرینو هم حضور درلود، ښاغلی مولوي عبدالحنان «عارف الله» د دغه معینیت د شکایتونو اورېدلو ریاست لپاره د نوي رئیس په توګه معرفی کړ.
د ګمرکونو او عوایدو محترم معین ښاغلي ملا عبدالقاهر «ادریس» چي دغه پېژند ناستي ته ئې وینا کوله وویل: «د مشرانو له خوا چي کوم مسؤلیتونه موږ او تاسو ته را سپارل کېږي، موږ مکلف یو، چي دغه مسؤلیتونه په ښه توګه اجرأ او خلکو ته ځواب ویونکي و اوسو.»
نوموړي همدارنګه زیاته کړه، چي شته نظام د ولس په همکارۍ منځته راغلی دئ؛ نو موږ او تاسو ته لازمه ده، چي اوس د همدې ولس قدر او ښه خدمت وکړو او له ټولو ئې وغوښتل، چي له ولس سره نیک چلند وکړي.
د یادوني وړ ده، چي د دغه ریاست پخوانی رئیس مولوي عبیدالله «ابو احمد» د مالیې وزارت د مقام د فتر رئیس په توګه ګومارل سوی دئ.
