د ولایتي ګمرکونو د بررسۍ، تعرفې او بیي ایښودني برخو یو شمېر کارکوونکو ته ۲۵ ورځنی روزنیز ورکشاپ پیل سو
د ولایتي ګمرکونو د بررسۍ، تعرفې او بیي ایښودني برخو یو شمېر کارکوونکو ته (۲۵) ورځنی روزنیز ورکشاپ د ګمرکونو او عوایدو په ملي اکاډمۍ کي پیل سو.
د دې روزنیز ورکشاپ په پرانيستغونډه کي، چي د ګمرکونو لوی رئیس ښاغلي الحاج مفتي عبدالمتین سعید او د مالیې وزارت د بشري سرچینو ریاست د وړتیا لوړلو امر ګډون کړی وو، په پیل کي د ګمرکونو لوی رئیس ټولو ګډونوالو ته ښه راغلاست وویل او د ولایتي ګمرکونو د یادو برخو کارکوونکو ته ئې په صادقانه ډول د ور سپارل سویو دندو تر سره کولو، د کارکوونکو تر منځ د پوره همغږۍ، سوداګرو ته د اسانتیاوو رامنځته کولو او یو شمېر نورو برخو کي لازمي سپارښتني وکړې. نوموړي؛ د یاد ورکشاپ ګډونوالو ته وویل، چي له دې روزنیز ورکشاپ څخه پوره ګټه واخلي او زده کړل سوي موضوعات له خپلو همکارانو سره هم شریک کړي.
د مالیې وزارت د بشري سرچینو ریاست د وړتیا لوړلو آمر د دا ډول روزنیزو ورکشاپونو د جوړېدو او د کارکوونکو د وړتیا لوړولو په ارزښت هر اړخیزي خبري وکړې.
د یادوني وړ ده، چي په دې روزنیز ورکشاپ کي به د ولایتي ګمرکونو د بررسۍ، تعرفې او بیي ایښودني برخو کارکوونکو ته په اړوندو برخو کي عملي او نظري روزنه ورکړل سي.
