د مالیې وزارت مالي معین د اطلاعاتو او کلتور وزارت له نشراتي معین سره وکتل
د مالیې وزارت مالي معین محترم (حاجي عبدالقدیر احمد) د اطلاعاتو او کلتور وزارت له نشراتي معین، ښاغلي (مهاجر فراهي) سره وکتل.
په دې لېدنه کي، چي د مالیې وزارت د بودیجې او خزاینو لویو ریاستونو رئیسانو، د باختر دولتي آژانس رئیس، پر رسنیو د څار رئیس او د دولتي ورځپاڼو رئیس هم ګډون درلود، په پیل کي د اطلاعاتو او کلتور وزارت نشراتي معین د یاد وزارت ملي، فرهنګي او اطلاعاتي ارزښت روښانه کړ او تر څنګ ئې په مالي برخه کي د یو لړ شته ستونزو یادونه وکړه.
ښاغلي فراهي د مالیې وزارت څخه د لګښتونو په اجراء کي د اړیني همکارۍ غوښتونکی سو او زیاته ئې کړه، چي د اطلاعاتو او کلتور وزارت په ځینو مهمو نشراتي برخو کي د ضروري او مهمو وسایلو د ترلاسه کولو لپاره له مالي اړخه له ځنډ سره مخامخ کېږي، چي په دې برخه کي اړتیا ته په کتو د مالیې وزارت له لوري د استثنایي اجراآتو همکاري اړینه ده.
د مالیې وزارت مالي معین محترم حاجي عبدالقدیر احمد وویل، چي مالیې وزارت د ټولو وزارتونو اساسي اړتیاوو ته پوره پاملرنه کوي او د اطلاعاتو او کلتور وزارت ته هم په یاده موضوع کي د پوره همکارۍ او اړینو اجراآتو د ترسره کولو بشپړ ډاډ ورکوو.
