د ریاستالوزراء اقتصادي مرستیال په مشرۍ د اقتصادي کمېسیون نوبتي غونډه ترسره سوه
د ریاستالوزراء اقتصادي مرستیال محترم ملا عبدالغني برادر اخند په مشرۍ د اقتصادي کمېسیون نوبتي غونډه په مرمرینه ماڼۍ کي ترسره او له اجنډا سره سم پر ټاکل سوو موضوعاتو بحث وسو.
په غونډه کي تر هراړخیز بحث وروسته پرېکړه وسوه چي د فراه ولایت د بخش آباد او نیمروز ولایت د کمال خان بندونو د پاتي چارو د بشپړولو په موخه دي اړوند وزارتونه او ادارې د بودیجې له توشيح وروسته خپلي چاري ګړندۍ کړي. د اقتصادي کمېسیون په یاده نوبتي غونډه کي د عایداتي منابعو د فعالولو په اړه د عالیقدر امیرالمؤمنین حفظه الله د فرمان د تطبیق اړوند د مالیې وزارت لخوا وړاندي سوی راپور او مربوطه وړاندیزونه تائید او پرېکړه وسوه، چي د مشرتابه عالي مقام سره دې شریک کړل سي.
همدا راز اقتصادي معاونیت او مالیې وزارت ته دنده وسپارل سوه چي په ګډه د عایداتي منابعو د فعالولو لپاره لا نور کار هم وکړي او ټولو وزارتونو او ادارو ته سپارښتنه وسوه چي د عایداتي منابعو د غښتلتیا په موخه خپلې پالیسۍ غني او له اقتصادي معاونیت سره ئې شریکي کړي. په ناسته کي د خوړو او درملو ملي ادارې په مشرۍ استخباراتو لوی ریاست، د صنعت او سوداګرۍ، مالیې، کرنې، اوبو لګولو او مالدارۍ له وزارتونو څخه جوړې سوې کمېټې ته دنده وسپارل سوه چي افغانستان ته د غیر قانوني او بې کیفیته خوړو او درملو د تورید او بیلټۍ د مخنیوي په موخه یوه جامع کړنلاره جوړه او د تایید لپاره ئې په عاجله توګه اقتصادي کمېسیون ته وړاندې کړي.
د اقتصادي کمېسیون له همدې پرېکړې وروسته د خوړو او درملو ټول شرکتونه او سوداګر مکلف وبلل سول، چي د یوې نیمي میاشتي په موده کي خپل ټول واردات د خوړو او درملو ادارې له اصولو سره برابر کړي، که له ټاکلي نېټې وروسته هم هغوی د ناسمو موادو له واردولو ډډه ونه کړي، له قانوني چلند سره به مخ کيږي. همدا شان په غونډه کي د جوزجان ولایت قوش تېپې او د رزاب ولسوالیو ته د برېښنا رسولو په موخه د افغانستان برېښنا شرکت په مشرۍ جوړي سوې تخنیکي کمېټې ته دنده وسپارل سوه، څو یادي سیمي ته سفر وکړي او دغو ولسوالیو ته د برېښنا رسولو موضوع له نږدې و ارزوي او خپل راپور د وروستي تصمیم لپاره اقتصادي کمېسیون ته وړاندي کړي.
د غونډې په پای کي د کابل ښاروالۍ لخوا د بهزاد سینما اړوند سیمي، د بهزاد سینما مقابل سیمي او په درېیم مکروریانو کي د قاضي پلازا شاته د ځمکو د عامه او خصوصي مشارکتي طرحو قراردادونه د آزادي داوطلبۍ له لاري د وړاندي سویو پروپوزلونو په شرایطو سره، تائید سول.
