د بودیجې او خزاینو ریاستونو او نورو دولتي ادارو ترمنځ د همغږۍ ناسته ترسره سوه
د مالیې وزارت د بودیجې او خزاینو ریاستونو او د نورو دولتي ادارو د مالي څانګو ترمنځ د همغږۍ په موخه ناسته د بودجې او خزاینو ریاستونو د رئیسانو او د نورو دولتي ادارو د مالي څانګو د استازو په ګډون د مالیې وزارت په خیبرهال کي ترسره سوه.
په دغه غونډه کي چي د دولتي ادارو د مالي څانګو او د مالیې وزارت د خزانې او بودجې عمومي ریاست ترمنځ د کاري بهیر د ښه والي او چټکتیا په موخه جوړه سوې وه، د دغه وزارت د بودجې او خزاینو ریاستونو ترمنځ پر شته ستونزو، د مالیې وزارت او نورو دولتي مالي څانګو پر همغږۍ. د ال سی (لیترآف کردیټ) او د اداراتو بانکي حسابونو ته د پيشکي حوالو د انتقال پر طرزالعملونو، د دولتي ادارو مالي برخو کارکوونکو لپاره پر روزنیزو پروګرامونو او نورو اړوندو موضوعاتو بحث او خبري اتري وسوې.
د دې ادارو ترمنځ د لا همغږۍ په موخه د مالي رئیسانو نظریات او وړاندیزونه واورېدل سول او پریکړه وسوه، چي د پېشکي حوالو د انتقال طرزالعمل دي د لا غني کېدو په موخه له نورو ادارو سره شریک سي؛ ترڅو دوی هم خپل نظریات او وړاندیزونه په اړونده برخه کي شریک کړي.
