د ګمرکونو د اصلاحي طرحي د تطبیق په موخه کاري ناسته وسوه
د ګمرکونو د اصلاحي طرحي د تطبیق په موخه کاري ناسته، د عوایدو او ګمرکونو معین، ملا محمد ناصر آخوند او د مالیې وزارت بېلابېلو ادارو د رئیسانو په ګډون د مالیې وزارت په خیبرهال کي ترسره سوه.
د ناستي په پیل کي د مالیې وزارت د مقام سلاکار محمد خلیل الله صالح زاده د اصلاحاتو راوستو، د کارکوونکو او مراجعینو ستونزو ته د رسېدني، له قاچاقو، فساد او وخت ضایع کېدو د مخنیوي په موخه د بېلابېلو کمېټو د جوړېدو او په ټول هيواد کي د یو ډول قانون د تطبیق په اړه د عوایدو او ګمرکونو معین ته معلومات وړاندي کړل.وروسته بیا ګډونوال د کمېټو په اړه خپل نظریات او وړاندیزونه شریک کړل، چي ملا محمد ناصر آخوند له مسولینو وغوښتل چي دغه نظریات او وړاندیزونو ته هم په کمېټو کي ځای ورکړي.
د یادونې ده چې دغو کمېټو کي( د تشویقي امتیازاتو کمېټه، د قیمت ګذارۍ د اصلاح کمېټه، د بېلټۍ د ستونزو د حل کمېټه، د بېلابېلو کارکوونکو او سوداګرو د مجازاتو د میکانیزم کمېټه، د ري اکسپورټ د میکانیزم کمېټه، د یو ډول ګمرکي رژيم د تطبیق کمېټه، د بیو او لومړنیو توکو د تعرفې د میکانیزم کمېټه، د لېږد فورم له تخلفاتو څخه د مخنیوي کمېټه، د ریسک منجمنټ کمېته، ګمرکي لومړنیو حقیقي اسنادو ته د لاسرسۍ کمېټه، د فیس ټرانزیک د لوړوالي او په داخلي بازارونو کي د تخلیې د مخنیوي کمېټه، د جواز ورکوني په برخه کي د تخلفاتو د مخنیوي کمېټه، د سیسټمونو د پراختیا کمېټه، له تاسیساتو څخه د ګټه اخیستي او استراس د انتقال کمېټه، د ګمرکي محصول د ارزوني او ګمرکونو د موقعیت بدلون کمېټه، په ګمرکونو کي د بانکونو د څانګو د پرانیستې کمېټه، په ګمرکونو کي د عصري تکنالوژۍ د نصب او ګټي اخیستني کمېټه، په ګمرکونو کي د پروسې د اسانتیا رامنځته کولو کمېټه، د ګمرکونو د معیاري کيدو په موخه د تاسیساتو او تجهیزاتو د ارزوني کمېټه او د سینګل وینډو سیستم د تطبیق اروزنې کمېټه) شاملي دي.
