د مالیې وزارت سرپرست د کابل ولایت د ترافیکو له مسؤل سره ولیدل
د مالیې وزارت سرپرست الحاج ملا هدایت الله بدري تېره ورځ د کابل ولایت د ترافیکو له لوی مدیر مولوي خیال محمد غاور سره په لیدنه کي موټرونو ته د اسنادو پر ورکړه ټینګار او د ښاري نظم د رامنځته کولو هیله وکړه.
د لیدني په پیل کي د کابل ولایت د ټرافیکو عمومي مدیر الحاج خیال محمد غاور، د مالیې وزارت سرپرست ته د خپلو کړنو، موټرونو ته د اسنادو د ورکړي پروسې، په کابل ښار کي د موټرونو د بې نظمۍ او بېرته کنټرول پر څرنګوالې، غټو او کوچنیو موټرونو ته د اسنادو پر ورکولو، د اسنادو په ورکړي سره په ښار کي د بې نظمۍ په راکمولو، د ښاري نظم لپاره د دې مدیریت له خوا د نوي طرحي پر جوړولو، د تر وخت تېرو اسنادو پر کنټرول، د باقي اسنادو پر ارزولو او دې ته ورته یو شمېر نورو اړوندو مسایلو په تړاو هر اړخیز معلومات ورکړل.
د مالیې وزارت سرپرست الحاج ملا هدایت الله بدري، د دوی د نظرونو او معلوماتو له اورېد وروسته نوموړي ته سپارښتنه وکړه، چي د ترافیکو مدیریت دي د ښار د نظم په برابرولو او موټرونو ته د اسناد د ورکړي او ارزونې په برخه کي له پوره پاملرني کار واخلي او هیله یې وښوده، چي د کابل د ترافیکو عمومي مدیریت به د یادو سوو مواردو په برخه کي چټک ګامونه پورته کړي او په هره برخه کي، چي مالیې وزارت ته اړتیا ولري، د قانون په رڼا او امکاناتو په پام کي نیولو سره به هر راز مرسته ورسره وکړي.
