مالیې وزارت د رهبرۍ پلاوي اتمه ناسته ترسره سوه
د مالیې وزارت د عوایدو او ګمرکونو مرستیال الحاج ملا محمد ناصر اخند، په مشرۍ د مالیې وزارت د رهبرۍ پلاوي اتمه ناسته د دې وزارت په مقام کي ترسره سوه.
په دغه ناسته کي چي یو شمېر رئیسانو او د مقام سلاکارانو ګډون کړی وو، په پیل کي د مالیې وزارت د عوایدو او ګمرکونو مرستیال الحاج ملا محمد ناصر اخند، د رهبرۍ پلاوي د تېرې ناستي د پرمختګونو اولاسته راوړنو راپور اورېدو ترڅنګ وویل: د رهبرۍ د ناستي موخه د مالیې وزارت ټولو اړوندو ادارو کي د کارونو چټکتیا، خنډونو ته د حل لارو پیدا کول او د راتلونکي لپاره د نوو تدابیرو نیول دي. موږ د کاري پرمختګونو په برخه کي له ټولو ادارو مننه کوو او ترڅنګ یې د مالیې وزارت له ټولو کارکوونکو په کلکه غوښتنه کوو، چي خپل ځانونه دي په شرعي اصولو برابر کړي او په اسلامي چوکاټ کي دي خپلو دندو ته راځي.
همدا شان د مالیې وزارت د مقام ستر سلاکار محمد اقا کوهستاني، د رسمي چارو پر چټکتیا، په چارو کي له دوه ګوني اجراآتو د مخنیوي او د اداري تسلسل اړوند متحدالمال لېږلو نه رعایت کولو معضلې پر هواري بحث او خبري وکړې.
د ناستي ګډونوالو؛ د عوایدو لوی ریاست ته د ټولو ولایتونو مستوفیتونو را پور ورکولو وړاندیز، په لږ توپیر سره د مالیې وزارت د لوګو پر منظورۍ خپل نظرونه او وړاندېزونه سره شریک کړل.
د ناستې په پای کي پرېکړه وسوه، چي د رهبرۍ پلاوي اتمي ناستي راپور او پرمختګونه دي راتلونکي ناستي ته وړاندي سي.
