د مالیې وزارت د رهبرۍ شورا (۷) اوومه ناسته ترسره سوه
د مالیې وزارت د رهبرۍ شورا (۷ مه) نوبتي ناسته د مالیې وزارت د مقام په فتر کي تر سره سوه. په دغه غونډه کي ، چي د مالیې وزارت د سرپرست وزیر، الحاج ملا هدایت الله بدري له لوري يې مشري کېدله، پکښي د یاد وزارت د مختلفو ریاستونو رئیسانو او اداري مسؤلینو ګډون کړی وو.
غونډه د قرآن عظیم الشان د مبارکو ایاتونو په تلاوت پیل سوه او ورپسې د مالیې وزارت سرپرست الحاج ملا هدایت الله بدري د پیل وینا وکړه او د غونډې ګډونوالو ته یې ښه راغلاست ووایه. ورسره سم د تیرو غونډو د پرېکړو او پرمختګونو وروستی راپور وړاندي سو. او همدا راز د ټولو ولایتونو د مستوفیتونو لپاره د عوایدو لوي ریاست له لوري، ټاکل سوي هیئت خپل راپور له مشرتابه سره شریک کړ.
په دغه غونډه کي د ارشاد او دعوت ریاست د فعالولو خبر ورکول سو او ددغه ریاست لپاره ټاکل سوی رئیس د غونډي ګډونوالو ته ور وپېژندل سو. په پای کي د تدارکاتو ریاست له لوري د لومړنیو اړینو وسایلو نوملړ د رهبرۍ شورا سره شریک سو او غونډه د دعا په ویلو سره پای ته ورسېده.
