د ملي بس دولتي شرکت د مدیره پلاوي ناسته وشوه
د مالیې وزارت د خدماتو رئیس اجمل وزیري په مشرۍ چې د مدیره پلاوو ټولو غړو یې هم ملتیا کوله، د ملي بس دولتي شرکت د مدیره پلاوي ناسته د اداري معینیت د کنفرانسونو په تالار کې وشوه.
د ملي بس دولتي شرکت ریاست تر دې وړاندې د ټرانسپورټ وزارت په چوکاټ کې فعالیت درلود، خو د دولتي شرکتونو د قانون له مخې د دې شرکت مدیریت مالیې وزارت ته سپارل شوی دی او یاد وزارت د شرکت د ټولو فعالیتونو څارنه او مدیره پلاوي د ریاست چارې پر غاړه لري.
په دې ناسته کې دواړو لوریو د ملي بس شرکت په بیا جوړېدنه، د ښاري ټرانسپورټ د خدمتونو په وړاندې کولو، د شرکت داخلي وضعیت ښه کېدو، د عوایدو لوړېدو، د شرکت په لګښتونو کې سپما، د ۱۵ کلن بېلانس په ترتیبولو، اوسني تشکیل کې د اصلاحاتو په راوستو او د معاشونو د سکېل په تصویب بحث او د نظرونو تبادله وکړه.
د ناستې په پای کې د زورواکو له لوري د دې شرکت د جایداد د غصب او د شرکت د جایدادونو کرایې د نه ورکړې په تړاو مشخص وړاندیز وشو او په هکله یې اړینې پرېکړې وشوې.
