ټول دولتي شرکتونه باید د دولت لپاره په تلپاتې عوایدي سرچینو بدل شي
د دولتي شرکتونو د ټولیزې ارزونې د ناستو په دوام، د دولتي شرکتونو عمومي رئیس میرویس بهیج او ورسره مل پلاوي د انټرکانټيننټال له دولتي شرکت څخه لیدنه وکړه.
په دې لیدنه کې چې د دولتي شرکتونو یو شمېر رئیسانو یې ملتیا کوله، د انټرکانټيننټال دولتي شرکت عمومي رئیس محمد شهریار مومند د یوه پرزنټیشن په لړ کې د یاد شرکت ټولیز وضیعت وړاندې کړ او د تشکیلاتي اصلاحاتو د تطبیق، د انټرکانټيننټال دولتي شرکت مالي وضیعت، د یاد شرکت دوه کلن مالي پلان، ګټې او زیان د بیلانس په مطابق د عوایدو وضیعت، د شیت بیلانس په مطابق د شرکت مالي وضیعت، د تولید پراختیا، خدماتو، اساسي عوایدو او نور اړوندو مسایلو په طرحه کې د اصلاح په موخه د دولتي شرکتونو رهبري پلاوي ته معلومات وړاندې کړل.
د دولتي شرکتونو عمومي رئیس میرویس بهیج د انټرکانتيننټال دولتي شرکت اجرائیوي پلاوي ته وویل، چې د دولتي شرکتونو د حقوقي شخصیت د بدلون موخه دا ده، چې دغه شرکتونه په کاري برخه کې په مستقله توګه عمل وکړي او په تدریجي توګه د ځان بسیاینې په لور لاړ شي، ترڅو د هېواد ملي بودیجې سره مرسته وشي.
ښاغلي بهیج ټینګار وکړ، چې په ټولو دولتي شرکتونو کې باید د موثریت او مثمریت اصلونه تطبیق شي، نوموړي زیاته کړه، چې یاد شرکتونه باید له مارکېټ سره د سیالۍ توان پيدا کړي او د دولت لپاره د په عوایدي سرچینې بدل شي.
