د مالیې وزارت سرپرست په سریلانکا کې د افغانستان له سفیر او د سویلي اسیا د چاپیریالي همکاریو سازمان له دوره یي عمومي رئیس سره ولیدل
د مالیې وزارت سرپرست محمد خالد پاینده، په سریلانکا کې د افغانستان له سفیر محمد اشرف حیدري او د سویلي اسیا د چاپېریالي همکاریو سازمان دوره یي عمومي رئیس سره د خپل کار په دفتر کې ولیدل.
په دې لیدنه کې دواړو لوریو په سویلي اسیا کې د چاپېریال ساتنې، په سیمه کې د چاپېریال ساتنې د تعاملاتو په موخه د نوموړي سازمان په پروګرامونو او همکاریو او دارنګه موجودو فرصتونو، په هیواد کې د هوا ککړتیا کمېدو په موخه دوه اړخیزه همکاریو، د بودیجې جوړونې په بهیر کې د اقلیمي تاثیراتو په پام کې نیولو او نورو اړوندو مسایلو په تړاو خبرې او د نظرونو تبادله وکړه.
د مالیې وزارت سرپرست، د چاپېریال ساتنې په تعاملاتو کې د سویلي اسیا د چاپیریالي همکاریو سازمان رول د غړو هیوادونو لپاره اړین وباله او د افغانستان او یاد سازمان ترمنځ د ژورو او پراخو اړیکو ټینګېدو غوښتونکی شو. په مقابل کې ښاغلي حیدري ژمنه وکړه، چې د اړتیا په صورت کې یاد سازمان له افغانستان سره د چاپېریال ساتنې په برخه کې تخنیکي همکاریو ته چمتو دی او له دې هیواد سره به همکاري کوي.
د یادونې وړ ده چې د سویلي اسیا د چاپېریالي همکاریو سازمان (SACEP) یو سیمهییز سازمان دی چې د سویلي اسیا اته هیوادونه (افغانستان، بوتان، هندوستان، سریلانکا، مالدیو، بنګله دیش، پاکستان او نیپال) یې غړي دي چې دا مهال د دې سازمان دورهیي ریاست د افغانستان پر غاړه دی.
