د مالیې وزارت سرپرست د اطلاعاتو او کلتور وزارت د ځوانانو له معین سره وکتل
د مالیې وزارت سرپرست محمد خالد پاینده، د اطلاعاتو او کلتور وزارت د ځوانانو له معین ډاکټر ادریس الکوزي، سره وکتل.
په دې لیدنه کې دواړو لوریو په ټول هیواد کې د ځوانانو ملي بحث په جوړولو او د ملي عوایدو په زیاتېدو کې د دوی په رول، د ملي عوایدو راټولېدو بهیر د څارنې او د عوایدو زیاتېدو لپاره د ځوانانو د طرحې او په دې سکټور کې د روڼتیا په تړاو بحث او د نظرونو تبادله وکړه.
پرېکړه وشوه، چې دغه بحثونه دې د هیواد په ۳۴ ولایتونو کې د مالیې وزارت، اکاډمیکو ټولنو، مدني ټولنې او نوښتګرو ځوانانو د اقتصادي کارپوهانو په راټولېدو ترسره شي.
د یادونې وړده، چې د جمهوري ریاست د لارښوونې پر بنسټ د ځوانانو لومړنۍ عالي شورای په پرانیستنه کې د دې بحث، موخه په ملي مسایلو کې ځوانانو ته د رول ورکولو او ملي عوایدو راټولېدو کې د رغنده پروګرامونو د طرحې وړاندي کول او فساد مخنیوی دی.
