د مالیې وزارت نوي ګمارل شوي رئیسان معرفي شول
د مالیې وزارت سرپرست محمد خالد پاینده، له لوري د مالیې وزارت په وړاندیز او ولسمشرۍ ماڼۍ د حکم پر بنسټ پنځه تنه نوي ګمارل شوي رئیسان نن د اړوندو ریاستونو کارکوونکو ته ور معرفي شول.
د دې حکم په اساس ایمل جهانګیر د تدارکاتو ریاست د سرپرست، اجمل وزیري د خدماتو ریاست د سرپرست، اولکر بیګم ایشچي د بېمو چارو د مسلکي ریاست د سرپرستې، بلال صافی د دولتي شرکتونو د څارنې او ارزونې د سرپرست او احمد جاوید د دولتي شرکتونو د سوداګریزو چارو د سرپرست په توګه معرفي شول.
د نویو رئیسانو د معرفۍ په مراسمو کې چې د مالیې وزارت یو شمېر رئیسانو او کارکوونکو ګډون کړی وو، د مالیې وزارت سرپرست نویو رئیسانو ته په چارو کې د بریالیتونو غوښتنې ترڅنګ وویل، چې یادې ادارې د مالیې وزارت له کلیدي ریاستونو څخه دي. نوموړي له نویو ګمارل شویو رئیسانو څخه وغوښتل چې ورسپارل شوې چارې دي په پوره ریښتینولۍ سرته ورسوي او په ښه مدیریت سره په مخ کې شته ستونزې حل کړي.
نویو ګمارل شویو رئیسانو د مالیې وزارت د مشرتابه له باور څخه مننه وکړه او ژمنه یې وکړه، چې ورسپارل شوې چارې به په پوره صداقت ترسره کوي او له هیڅ راز هڅو به ځان نه سپموي او ترڅنګ یې له خپلو همکارانو د همکارۍ غوښتونکي شول.
