د مالیې وزارت د کړنو، لاسته راوړنو او اصلاحاتو پلي کولو په تړاو مطبوعاتي کنفرانس
د مالیې وزارت سرپرست محمد خالد پاینده، نن ورځ د مطبوعاتي کنفرانس له لارې د مالیې وزارت کړنو، لاسته راوړنو او وروستیو اصلاحاتو پلي کولو په تړاو له اولس او رسنیو سره معلومات شریک کړل.
په دې کنفرانس کې چې د مالیې وزارت مالي مرستیال عبدالحبیب ځدراڼ، د عوایدو او ګمرکونو مرستیال عالم شاه ابراهیمي او د پالیسۍ مرستیال نذیر کبیري شتون درلود، په پیل کې د مالیې وزارت سرپرست؛ د هیواد په عوایدي سرچینو کې د وروستیو اصلاحاتو په پلي کولو خبرې وکړې. نوموړي وویل، چې مالیې وزارت د عوایدو او ګمرکونو برخې په تشکیلاتي جوړښت باندي بیا کتنه کوي او له نړیوالو معیارونو سره سم یې برابروي. نوموړي زیاته کړه، چې مالیې وزارت شته ستونزو ته د رسېدو لپاره د تعرفې، قیمت ټاکنې او تنفیذ برخو کې د ګمرکونو تشکیلاتي جوړښت ته بدلون ورکړی او هغه یې اصلاح کړی.
د مالیې وزارت سرپرست وویل، چې ولایتونو ته د سفر موخه د خلکو او سوداګریزو محمولو د ستونزو رفع کولو لپاره د چارو ښه کول او د ګمرکونو د تاسیساتو مډرن کولو په منظور د ګمرکونو او ولایتونو د مستوفیتونو وضعیت ارزول دي.
هغه زیاته کړه، چې د عوایدي سرچینو جوړښتي ستونزو حل، سکنرونو نصبول، څارونکي کامرې او ډیجیټلي تلې، د ملي عوایدو زیاتېدو او روڼتیا د خوندیتوب سبب ګرځي. ده زیاه کړه، چې موږ په دې برخه کې ډېر کارونه ترسره کړي دي او زموږ هڅه داده، چې ګمرکي زېربنا او عوایدي برخې پیاوړې کړو.
د مالیې وزارت سرپرست وویل، چې د بودیجې جوړونې بهیر باید له ملي شورای سره په همکارۍ بیا وکتل شي او موږ ژمن یو چې د ۲۰۲۰ جینوا کنفرانس ژمنې له مرستندویانو سره په ښه توګه تعقیب کړو. هغه له افغانستان سره د نړیوالې ټولنې ۱۳،۴ میلیارده امریکایي ډالرو مرسته یوه ستره لاسته راوړنه وبلله، خو زیاته یې کړه چې د څارنې موده لږه شوې ده ځکه دغه موده له څلوروکلونو یوه کال ته راښکته شوې ده.
همدا شان د مالیې وزارت سرپرست؛ د عامه مالي مدیریت ښه کېدو، د ښوونکو او NTA کارکوونکو د معاشونو پلي کولو څرنګوالي، له ګاونډیو هیوادونو سره د دوه اړخیزه سیمه ییزو اقتصادي همکاریو، له مرستندویه هیوادونو او بنسټونو سره د اړیکو ټینګېدو او نورو ګڼو اړوندو مسایلو په تړاو خبرې وکړې.
په دې کنفرانس کې د مالیې وزارت مرستیالانو د عوایدو راټولېدو په وضعیت، ملي بودیجې، د جینیوا کنفرانس د ژمنو په پلي کېدو، مالي او اقتصادي اصلاحاتو پلي کولو او نورو ورته مسایلو په تړاو خبرې وکړې.
د کنفرانس په پای کې د خبریالانو پوښتنو ته ځوابونه وویل شول.
