د مالیې وزارت سرپرست د کانونو او پترولیم وزارت له وزیر سره وکتل
د مالیې وزارت سرپرست محمد خالد پاینده، د کانونو او پترولیم وزارت له وزیر هارون چخانسوري، سره د کانونو سکټور د عوایدو زیاتېدو په څرنګوالي، د قراردادونو د پړاوونو ترسره کولو ټکني کېدو مخنیوي، د قیمتي او نیمه قیمتي ډبرو د کړنلارې نهایي کولو، له شرکتونو د کانونو وزارت د پورونو ترلاسه کولو، د کانونو صادرولو د اسانتیا لپاره د وسیلې په توګه د تعرفې تنظیم او یو شمېر نورو ورته موضوعاتو په تړاو بحث وکړ.
د کانونو او پترولیم وزیر زېری ورکړ، چې د روان مالي کال په اوږدو کې به د کانونو او پترولیم وزارت عواید د پام وړ زیات شي. همدا شان د قیمتي او نیمه قیمتي ډبرو د قاچاق مخنیوي په موخه کړنلاره نهایي شوې ده، چې د اقتصاد عالي شورای په بله ناسته کې به وړاندي شي او له تصویب سره سم به یې ۱۴۳ میلیونه ډالره د هغو د رویالیټي له کبله د دولت عوایدو ته ور زیات شي. همدا شان نوموړی د مالیې وزارت له لوري په شرکتونو باندي د پورونو ترلاسه کولو په موخه د فشار زیاتېدو او د استخراج شویو اقلامو صادرولو بهیر اسانولو په موخه د تعرفې د تنظیم او د کانونو او ولایتونو په تفکیک د عوایدو دقیق تشخیص په موخه د حساب جوړونې په برخه کې د همکارۍ غوښتونکی شو.
د مالیې وزارت سرپرست؛ د یاد وزارت له لوري د پام وړ عوایدو په زیاتېدو خوښي څرګنده کړه او د پورونو ترلاسه کولو، تعرفې تنظیم او د قیمتي او نیمه قیمتي ډبرو د کړنلارې تائیدولو په برخه کې د هر راز همکاریو د ژمنې ترڅنګ یې زیاته کړه، چې له دې وروسته به له بودیجوي واحدونو سره د بودیجې استماعیه ناستو سربېره د عوایدو استماعیه ناستې هم ترسره شي او له هرې ادارې څخه به تحصیل شوي عواید له تخصیص شوې بودیجې سره اړیکه ولري.
