د مالیې وزارت سرپرست په افغانستان کې د اروپایي ټولنې له سفیر سره وکتل
د مالیې وزارت سرپرست ښاغلي محمد خالد پاینده، د سلواغې میاشتې په ۱۴ مه نېټه په افغانستان کې د اروپایي ټولنې له سفیر ښاغلي انډریاس وان برنټ، سره د مالیې په وزارت کې وکتل.
په پیل کې د افغانستان لپاره د اروپایي ټولنې سفیر، ښاغلي پاینده ته د مالیې وزارت د تصدۍ ورسپارلو مبارکي ورکړه او په چارو کې یې ورته د بریالیتوب غوښتنه وکړه. نوموړي له افغانستان سره د دې ټولنې د مرستو د دوام ډاډ ورکړ او په دې برخه کې یې په لا روڼتیا ټینګار وکړ.
همدا شان په دې ناسته کې دواړو لوریو په بدخشان ولایت کې د شورابک بند په بشپړېدو، د ملي عوایدو په راټولولو کې د مالیې وزارت په پلانونو، مالي ځان بسیاینې ته په رسېدو، د ملي بودیجې ترتیب او اغېزمن لګښت او یو شمېر نورو ورته مسایلو په تړاو خبرې او د نظرونو تبادله وکړه.
په افغانستان کې د اروپایي ټولنې سفیر، له فساد سره د مبارزې په برخه کې د افغانستان حکومت د کړنو هرکلی وکړ او هیله یې څرګنده کړه چې له فساد سره د مبارزې بهیر ګړندی شي.
د مالیې وزارت سرپرست، د دې ټولنې له مرستو د مننې ترڅنګ وویل، چې د افغانستان حکومت او په ځانګړي توګه د مالیې وزارت له فساد سره د مبارزې په برخه کې جدي ژمنه کړي او له فساد سره د مبارزې په برخه کې چې کومې کړنې اړینې دي، تر سره به یې کړي. هغه زیاته کړه، چې د ملي بودیجې طرحه په هیواد کې د روانو شرایطو، لومړیتوبونو او مالي امکاناتو په پام کې نیولو سره ترتیب شوې ده. موږ هیله لرو، چې داځل یې په ولسي جرګه کې د خلکو استازي څومره ژر چې کېدونکي وي تصویب کړي.
ښاغلي پاینده وویل، چې موږ هڅه کوو څو په روان مالي کال کې د ملي عوایدو راټولیدو ټاکلی شوي هدف ته ورسیږو
