د ګمرکونو لوی ریاست د کنټرول خوني د جوړولو پروژه پرانیستل سوه!
د ګمرکونو لوی ریاست د کنټرول خوني د جوړېدو پروژه د توکو د ورودي او خروجي فعالیتونو د دوامداره څارني او شفافیت تأمینولو په موخه د یو لړ مراسمو په ترڅ کي د کابل په ګمرک کي پرانیستل سوه.
په دې مراسمو کي د ګمرکونو او عوایدو معین الحاج ملا عبدالقاهر حاجي ادریس، د ګمرکونو لوی رئیس الحاج مفتي عبدالمتین سعید او د مالیې وزارت یو شمېر نورو مسؤلینو ګډون کړی وو.
د ګمرکونو او عوایدو معین ملا عبدالقاهر حاجي ادريس د دغه پروګرام په پرانیستې وينا کي وويل، چي د هر حکومت دنده خپلو خلکو ته غوره او راڼه خدمتونه وړاندي کول دي، د نننۍ پروژې له پرانیستي څخه هم موخه په ورودي او خروجي پروسه کي د توکو او سوداګریزو فعالیتونو دقت او چټکتیا، د امنیت زیاتول او د غیر قانوني توکو له ورود څخه مخنیوی کول دي او د اسلامي امارت مسؤلین هڅه کوي، چي د اسلامي شریعت په چوکاټ کي د شفافو خدمتونو په وړاندي کولو سره خپل مسؤلیتونه او دندي پرمخ یوسي؛ ترڅو لومړی د خدای (ج) او بیا د خلکو رضایت ترلاسه کړي.
ورپسې د ګمرکونو لوی رئیس الحاج مفتي عبدالمتین سعید د هیواد د آبادۍ او پرمختګ په برخه کي له دغه ګام څخه خوښي وښوده او زیاته ئې کړه، دغه کنټرول خونه، چي د سمبالولو په حال کي ده، د هیواد ټول ګمرکونه سره نښلوي او هیوادوالو ته د چټکو او رڼو خدمتونو د وړاندي کولو زمینه برابروي. هغه د افغانستان خلکو ته ډاډ ورکړ، چي د اسلامي امارت د مسؤلینو اقدامات او کړني په بشپړ ډول د خلکو او هیواد په ګټه دي.
وروسته بيا د يادي خوني د جوړولو شرکت مسؤل محمد ظاهر ابراهيمي وويل، چي دغه خونه به له نړيوالو معيارونو او سټنډرډ سره سمه جوړه سي.
په پای کي د دې پروژې د جوړولو کار د پټۍ په پرې کولو او د تهداب ډبري په اېښودلو سره رسماً پرانیستل سو، د دغي پروژې لګښت شاوخوا (۱۷،۵) میلیونه افغانۍ کېږي، چي په راتلونکو اتو میاشتو کي به بشپړ او ګټي اخیستني ته وسپارل سي.
