د بودیجې ترتیبولو د لارښود ورکشاپ تر سره سو
مالیې وزارت د ۱۴۰۲ مالي کال د ملي بودیجې د ترتیبولو چاري پیل کړي دي، چي په همدې لړ کي نن د ۱۴۰۲ مالي کال د بودیجې ترتیبولو لارښود په تړاو دوه ورځینی ورکشاپ د مالیې وزارت اداري معین مولوي حمدلله زاهد، د بودیجې لوی ریاست سرپرست حبیب الله سباوون او د وزارتونو د بودیجوي واحدونو او دولتي ادارو د استازو په ګډون د مالیې وزارت په خیبر صالون کې ترسره سو.
د مالیې وزارت اداري معین مولوي حمدالله زاهد د ورکشاپ په پرانیستې وینا کي د اسلام له نظره د اقتصاد او معیشت پر اصل خبري وکړې او وې ویل: د اسلام مبارک دین موږ ته ټول اړین اقتصادي مسائل روښانه کړي او په دې برخه کي د ټولو مسؤلو او غیر مسؤلو بنده ګانو لپاره رښتینولي معیار بلل سوی، چي د ژوند په ټولو چارو کي رښتینولي د انسان معیشت غني کوي. ښاغلي زاهد زیاته کړه، چي د وزارتونو بودیجوي واحدونه او ټولي دولتي ادارې دي د هيواد موجوده اقتصادي وضعیت ته په کتو د ۱۴۰۲ مالي کال لپاره د بودیجې طرحه ترتیب کړي او په دې برخه کي دي د غیر ضروري لګښوتونو مخنیوي ته جدي پاملرنه وکړي.
د بودیجې لوی ریاست سرپرست د هيواد د مالي وضعیت په تړاو لنډ معلومات ورکړل او زیاته یې کړه، چي اوسمهال د ملي بودیجي د تمویل یواځینۍ منبع کورني عواید دي؛ نو اړینه ده، چي د بودیجي د ښه مدیریت او د بودیجوي کسر د پوره کولو لپاره خپل ټول لګښتونه په سمه توګه کنټرول کړو.
په پای کي د ملي بودیجې د پلان او پالیسي امریت له لوري د وزارتو د بودیجوي واحدونو استازو ته د عادي او پراختیایي بودیجې د ترتیبولو په تړاو معلوماتي پریزینټیشن وړاندي سو.
