د عامه او خصوصي مشارکت د لمریزي او بادي برېښنا د څلورو پروژو قراردادونه لاسلیک شول
د روان ۱۳۹۹ کال د تلي میاشتي په ۲ مه نېټه په چهارچنار ماڼۍ کې د افغانستان ولسمشر جلالتمآب محمداشرف غني، د ولسمشرۍ مانۍ لومړي مرستیال جناب امرالله صالح، د مالیې وزارت نوماند وزیر او سرپرست ښاغلي عبدالهادي ارغندیوال او په افغانستان کې د امریکا متحده ایالاتو سفارت شازدافر ښاغلي راس ویلسن په حضور د لمریزې او بادي برېښنا د څلورو پروژو قراردادونه د زولرستان، فیلان انرژۍ، کواترو شرکت او ۷۷ ترکي کمپنیو سره لاسلیک شول.
یاد قراردادونه چې د ماليې وزارت اړوند د عامه او خصوصي مشارکت لوی ریاست له لوري د افغانستان برېښنا له شرکت سره په همغږۍ نهايې شوي وو، ټولټال ظرفیت یې تر ۱۱۰ میګاواټو پورې رسیږي چې پکې د عامه او خصوصي مشارکت پر بنسټ ۱۶۰ میلیونه ډالره پانګونه کیږي.
په دغو پروژو کې چې د امریکا متحدو ایالتونو پرمختیایي اداره یې تمويلوي په بلخ ولایت کې د ۴۰ میګاواټه لمریزې انرژۍ، د کابل نغلو د اوبو پر بند څرخېدونکې لمریزې برېښنا انرژۍ ۲۰ میګاواټه، په هرات ولایت کې د ۲۵ میګاواټه بادي او ۲۵ میګاواټه لمریزې څرخېدونکې برېښنا پروژې شاملې دي.
