د څار هیئت د اقتصادي وزارتونو او ادارو پر کړنو دوهمه ناسته وکړه!
د لېندۍ ۱۳مه ۱۴۰۴ هـ.ل
د افغانستان اسلامي امارت د اقتصادي کمېسیون د پرېکړي پر بنسټ او د عالیقدر امیرالمؤمنین (حفظه الله تعالی) په منظورۍ د اقتصادي وزارتونو او ادارو پر کړنو د څار هیئت ټاکل سوی دئ، چي د مالیې وزارت د ګمرکونو او عوایدو معین الحاج مفتي عبدالمتین سعید په مشرۍ ئې د یاد هیئت دوهمه ناسته د اقتصادي وزارتونو او ادارو د با صلاحیته استازو په ګډون د دغه معینیت د غونډو په تالار کي وسوه.
په پیل کي د تخنیکي هیئت د کړنو هغه راپور ګډونوالو ته وړاندي سو، چي د څار هیئت په لومړنۍ ناسته کي ئې مشري د ګمرکونو او عوایدو معینیت ستر سلاکار محمد موسی عمر کوله او راپور هم د ګډونوالو له لوري مثبت وارزول سو.
ور پسې په اړوندو ادارو کي هیوادوالو ته د لا ډېرو اسانتیاوو پر رامنځته کولو، د کار ځنډوني د مخنیوي پر لارو چارو، له ګډ تخینکي هیئت سره پر همکارۍ، مراجعینو ته د اسانتیا رامنځته کولو په موخه په ټولو اړوندو وزارتونو او ادارو کي د معلوماتو څانګي فعالولو او اړینو لاښودونو د چاپ او نصبولو او یو شمېر نورو موضوعاتو په تړاو بحث او لازمي پرېکړي وسوې.
