د ګمرکونو او عوایدو معینیت ټاکل سوي کلني عوایدي هدف ته رسېدلی دئ!
د مالیې ورزارت د ګمرکونو او عوایدو معینیت د اړوندو ریاستونو تر منځ د همغږۍ ناسته د ګمرکونو او عوایدو معین الحاج مفتي عبدالمتین سعید په مشرۍ د یاد معینیت د غونډو په تالار کي ترسره سوه.
په دغه ناسته کي د ګمرکونو او عوایدو معینیت د اړوندو ریاستونو ترسره سوي چاري په هراړخیز ډول وارزول سوې او د یادو ریاستونو ترمنځ په چارو کي د ښې همغږۍ او په (۱۴۰۳هـ.ل) مالي کال کي ټاکل سوي عوایدي هدف ته کتنه وسوه، چي له مخي ئې یاد معینیت خپل کلنی عوایدي هدف په بریالي ډول ترلاسه کړی دئ او د اړوندو ریاستونو ترمنځ په چارو کي همغږي لا پیاوړې سوې ده.
د ګمرکونو او عوایدو معین د اړوندو مسؤلینو د اخلاصمندانه هڅو له کبله یاد رامنځته سوي پرمختګونه وستایل او د چارو د لا ښه پرمختګ په موخه ئې له مسؤلینو سره لازمي سپارښتني شریکي کړې.
همدا راز د تېري ناستي د پرېکړو په اړه بحث او خبري وسوې او ټاکل سویو کمېټو د خپلو اجراآتو راپور وړاندي کړ، چي د غونډي ګډونوالو د یادو راپورنو په اړه هر اړخیز بحث وکړ او د اړوندو چارو د لا ښه والي په موخه لازمي پرېکړي وسوې.
