د ګمرکونو لوی ریاست په اداري ناسته کي پر یو شمېر مهمو موضوعاتو بحث او خبري وسوې!
د مالیې وزارت د ګمرکونو لوی ریاست د روان مالي کال (۱۷مه) اداري ناسته د ګمرکونو لوی رئیس مولوي محمد حامد احمد په مشرۍ د یاد ریاست په مقام کي جوړه سوه.
په دې ناسته کي د ګمرکونو لوی ریاست تخنیکي او حمایوي مرستیال، رئیسانو او یو شمېر آمرینو ګډون کړی وو.
له اجنډاء سره سم په دې ناسته کي د صادراتي، وارداتي او ټرانزيټي توکو په طي مراحلو کي پر سته ستونزو او حل لارو، د ګمرکونو لوی ریاست د ورځنیو چارو پر لا ښه والي، په ګمرکونو کي د یو شمېر سوداګریزو شرکتونو او صنعتکارانو د غوښتنو او ستونزو پر حلولو او یو شمېر نورو موضوعاتو خبري او په اړه ئې لازمي پرېکړي وسوې.
د یادوني وړ ده، چي د مالیې وزارت تل هڅه کوي، چي د هیواد په ګمرکونو کي کورنیو او بهرنیو سوداګرو ته د پام وړ اسانتیاوي برابري کړي؛ تر څو د ملي سوداګرۍ لا پراختیا ته ښه زمینه برابره سي.
