ټول دولتي شرکتونه دې د ګټې پر بنسټ په مارکېټ کې فعالیت وکړي
د دولتي شرکتونو عمومي رئيس داکټر میرویس بهیج د افغان پسټ دولتي شرکت څخه د لیدنې به ترڅ کې زیاته کړه، چې موږ له یو څه مودې را په دې خوا د دولتي شرکتونو مالي وضیعت او اساسي فعالیتونه ارزوو، ترڅو وکولای شو په دې بنسټونو کې اساسي اصلاحات راولوو.
نوموړي وویل، چې د شرکتونو لیدلوري باید په اساسي توګه بدل شي او په مارکېت کې د ګټې پر بسټ فعالیت وکړي، ترڅو وکولای شي له خصوصي سکټور سره سیالي وکړي او مالي ځان بسیاینې ته ورسېږي. له دولتي شرکتونو د ارزونې او څارنې موخه دا ده، چې په کاري پروسه کې یې چټکتیا او شفافیت را منځ ته شي، تر څو مناسبه ګټه وکړي. نوموړي زیاته کړه، چې د افغان حکومت د رهبرۍ لیدلوری دا دی، چې د دولتي شرکتونو د اصلاحاتو د تطبیق په برخه کې دې د ګاونډ او سویلي آسیا هېوادونو له بریالیو تجربو ځان ته الګو جوړه کړي.
د افغان پوست دولتي شرکت رئیس احمد وحید ویس، د افغان حکومت د دې لیدلوري ستاینه وکړه او وویل، چې یاد شرکت تر دې دمه له ۱۵۰ تر ۲۰۰ ډوله خدمتونه پېژندلي دي او په پام کې لري، چې خپلو هېوادوالو ته له همدې لارې، چټک، ارزانه او اطمیناني خدمتونه وړاندې کړي، د نوموړي په وینا د دغو خدمتونو په پلي کولو سره ملي عواید به د پام وړ زیاتوالي ومومي او د ډېریو هېوادوالو لپاره به په مستقیم او غیر مستقیم ډول کاري زمینه برابره شي.
همدارنګه د فساد پر وړاندې د مبارزې په برخه کې د افغان پسټ له خدمتونو استفاده کول به ډېر ګټور تمام شي، د نوي تشکیل په کارولو او ۲۰۰ ډوله عامه خدمتونو په وړاندې کولو سره به وکولای شو، چې د افغان دولت لپاره هر کال تر یو میلیارډ افغانیو زیات عواید تر لاسه کړو.
ښاغلي ویس زیاته کړه، چې موږ هڅه کوو تر څو د توکو او د اقلامو برخې ملي او بین المللي کارګو او لوژیستیک پر غاړه واخلو. هغه وویل، چې موږ د سوداګرۍ له وزارت سره خبرې کړې دي چې د ۷۰۰ ټنه صادراتي ځنغوځيو له جملې د ۳۰۰ ټنو کارګو افغان پسټ ته وسپارو او نړیوالو مارکېټونو ته یې ولېږدوو.
د افغان پسټ رئیس وویل، چې په مرکز او ولایتونو کې دغه شرکت ۸۰۰ تنه کارکوونکي لري. د هغه په خبره په ولایتونو کې د یاد شرکت د کارکوونکو مدیریتي او مسلکي وړتیا ټیټه ده او اړینه ده، چې د استخدام او معاشونو پالیسي نوې تعریف او د نویو غوښتنو پر اساس نوی تشکیل ترتیب کړای شي او د ازادې سیالۍ له لارې غوره کدرونه وګمارل شي.
د دولتي شرکتونو عمومي رئیس د یاد شرکت د اساسي فعالیتونو هرکلی وکړ او زیاته یې کړه، چې د افغان پسټ له خدمتونو ګټه اخیستنه د دې سبب ګرځي څو د بروکراسۍ، مراجعینو د ګڼه ګوڼې او وخت ضایع کېدو مخنیوی وشي او کارونه په ټاکلې موده او چټک ترسره شي. نوموړي د افغان پسټ شرکت اجرائیوي پلاوي ته هدایت ورکړ چې شرکت دې ژر تر ژره افتتاحیه بېلانس ترتیب کړي. همدا شان نوموړي د دولتي شرکتونو عمومي ریاست تخنیکي ډلې ته هدایت ورکړ چې د مالي پلان بشپړېدو او شرکت بیلانس په برخه کې همکاري وکړي، څو د مدیره پلاوي ناستې ته وړاندې شي او د ده له لوري منظور شي.
په پای کې ښاغلي ډاکټر بهیج د افغان پسټ شرکت ته لارښونه وکړه، څو د ۱۴۰۰ کال پلټونکی راپور د هرې ربعې په پای کې ترتیب کړي او بیا یې د دولتي شرکتونو د مالي چارو ارزونې او څارنې ریاست ته وړاندې کړي.
