د مالیې وزارت سرپرست د ټرانسپورټ وزارت له وزیر سره ولیدل

د مالیې وزارت سرپرست محمد خالد پاینده، نن په خپل کاري دفتر کې د ټرانسپورټ وزارت له وزیر قدرت الله ذکي سره ولیدل. په دې لیدنه کې چې د ګمرکونو عمومي رئیسي آمنې احمدي هم ګډون کړی وو، په درېوو موضوعاتو (د عوایدو راټولول، تناژ او سوداګریزې تعرفې) خبرې اترې وشوې. د ناستې په وروستیو کې د مالیې، ټرانسپورټ او ټولګټو وزارتونو تر منځ د همغږۍ په موخه د یوې تخنیکي کمېټې په جوړولو پرېکړه وشوه. په ځانګړي ډول له هغو ګمرکونو او عوایدو چې د هېواد په لویو لارو کې د ټرانزیټ او سوداګریزو توکو د لوړ تناژ لرونکي دي څارنه وکړي، تر څو له دې زیات د لویو لارو د ورانېدا لامل ونه ګرځي او د عوایدو او مالیاتو په را ټولونه کې اغېزمن تمام شي. همدارنګه دواړو لوریو په دې هوکړه وکړه، چې د بهرنیو توکو په ټرانزیټ کې د ګواښ او خنډونو د حل په موخه دې د تیر(TIR) سیستم ملي کمېټه اغېزمن ګامونه واخلي. چې له دې جملې یې د متعدد او څو ډولیزه پلېټونو له کارولو مخنیوی، د نویو او لوړ کیفیت لرونکو پلېټونو چاپول، تر څو د خلکو ستونزې حل شي.