د نړیوال بانک د وروستي راپور په تړاو د مالیې وزارت اعلامیه
د افغانستان اسلامي امارت، مالیې وزارت د نړیوال بانک په خپاره سوي راپور کي د افغانستان د اقتصادي وضعیت په تړاو له واقعیتونو سره سم د ټولو مثبتو څرګندونو هرکلی په داسي حال کي کوي، چي د مالیې وزارت اقتصادي لاسته راوړني تر دې هم زیاتي دي او په دې برخه کي د دوامداره مثبت تعامل غوښتنه کوي.
د نړیوال بانک په راپور کي ویل سوي، چي د ملي عوايدو او د صادراتو اندازه کي نسبت پخوا ته د پام وړ زیاتوالی راغلی، د ټولو دولتي کارکونکو معاشونه پر وخت ورکړل سوي، د خوراکي توکو او نفتي موادو بیې ټیټې سوي او د بهرنیو اسعارو پر وړاندي د افغانیو ارزښت ثابت پاتي سوی، چي په ټوله کي په ۲۰۲۲ میلادي کال کي د افغانستان اقتصادي وضعیت مثبت خوځښت کړی دئ.
دا چي د مالیې وزارت له لوري په اړوند ټولو مالي برخو کي بشپړ شفافیت رامنځته سوی، عواید په الکټرونکي او شفافه توګه راټولیږي، کورنیو او بهرنیو سوداګرو ته لازمي اسانتیاوي رامنځته سوي او لا نوري اسانتیاوي په پام کي نیول سوي او نړیوال بانک هم د واقعیتونوسره سم د افغانستان د اقتصادي وضعیت په تړاو نړۍ ته یو روښانه انځور وړاندي کړی؛ نو له نړیوالۍ ټولني هم غوښتنه کوو، تر څو له افغانستان سره مثبت اقتصادي تعامل ته دوام ورکړي او په دې برخه کي د محدویدتونو لګولو پر ځای د اقتصادي ودي د فرصتونو برابرولو لپاره همکاري وکړي؛ څو د بېکارۍ کچه راکمه سي، اقتصاد لا ډیر پیاوړی سي او موږ وکولای سو په راتلونکي کي د خپلو امکاناتو د ښه مدیرت له کبله اقتصادي ځانبسیایني ته ورسیږو.