په مالیې وزارت کي د شپږو قراردادي (NTA) بستونو ازموینه واخیستل سوه
د مالیې وزارت د بشري سرچینو ریاست د ۱۴۰۲ هـ ل کال د غبرګولي په ۳۰مه نېټه د دولتي شرکتونو لپاره د ۴ قراردادي بستونو (سوداګریز حقوقي ستر کارپوه، د سوداګرۍ د څېړني او پراختیا کارپوه، د عامه خصوصي مشارکت کارپوه او د ستراتیژیک او سوداګریز پلان د تحلیل او ارزوني کارپوه) او د عوایدو لوی ریاست د حقوقي خدمتونو ریاست د ۲ قراردادي بستونو (د پالیسۍ او مالیاتو د تحلیل کارپوه) ازموینه د آزادي سیالۍ له لاري واخیسته.
دغه آزموینه د مالیې وزارت مالي او اداري لوی رئیس بلال احمد قریشي، د بشري سرچینو رئیس مولوي احمدشاه شاکر، د اړیکو او عامه پوهاوي رئیس احمد ولي حقمل او د دولتي شرکتونو سوداګریزي برخي د پانګوني د جلب آمر عبدالاحد احدي په حضور کي په شفاف ډول ترسره سوه، چي (۴۹) کسانو پکښي ګډون کړی وو.
د یادونې وړ ده چي د مالیې وزارت مشرتابه د شایسته سالارۍ اصل ته ژمن دی او هڅه کوي چې په خپلو اړوندو ادارو کي مسلکي، ژمن او صادق کسان وګماري او د شفافیت اصل په پام کي ونیسي.
