له ۱۴ وزارتونو او امارتي ادارو سره د غیرمالیاتي عوایدو د تحلیل او ارزوني په تړاو ناسته وسوه!
د مالیې وزارت د عوایدو د لوی رئیس حافظ مولوي شاه حسین حسیني په مشرۍ د (۱۴) وزارتونو او امارتي ادارو له استازو سره د غیر مالیاتي عوایدو د تحلیل او ارزوني په تړاو ناسته وسوه.
په دغه ناسته کي د یادو وزارتونو او ادارو د غیر مالیاتي عوایدو د را ټولولو بهیر په هر اړخیز ډول و ارزول سو او د یادو ادارو له پاره د غیر مالیاتي عوایدو په برخه کي د ټاکل سوي عوایدي هدف وضعیت ته کتنه وسوه.
همدا راز هغو وزارتونو او ادارو، چي له ټاکل سوي عوایدي هدف څخه لوړ عواید ترلاسه کړي دي، د هغوی ستاینه وسوه او خپلي ګټوري تجربې ئې د ناستي له ګډونوالو سره شریکي کړې.
په دغه ناسته کي د وزارتونو او ادارو له پاره د احتمالي کسر د مخنیوي په موخه لازمي سپارښتني وسوې او غوره عوایدي فرصتونه ورته په ګوته سول؛ تر څو ټاکل سوي عوایدي هدف ته په ښه ډول ورسېږي.
