له پلازمېني کابل څخه ټولو ولایتونو ته د توکو د لېږد فورم اخیستل لغوه سو
د ګمرکونو لوی ریاست په وړاندیز او د مالیې وزارت مقام په منظورۍ سوداګرو ته د اسانتیاوو رامنځته کولو په موخه له پلازمېني کابل څخه د هیواد ټولو ولایتونو ته د توکو د لېږد لپاره فورم اخیستل لغوه سو.
تر دې وړاندي سوداګر مکلف وو، ترڅو له کابل څخه نورو ولایتونو ته د خپلو توکو د وړلو لپاره د لېږد دغه ځانګړی فورم واخلي. د دغه فورم د نه درلودولو په صورت کي د ګرځنده څارني او نورو اړوندو ادارو له لوري د سوداګرو د توکو لېږد ته اجازه نه ورکول کېده او دغي چاري د سوداګرو لپاره ستونزي جوړي کړي وې.
د یادوني وړ ده، چي د ګمرکونو لوی ریاست سوداګرو ته د اسانتیاوو رامنځته کولو په موخه له دې وړاندي د بلخ، آقینې او کندوز په ګمرکونو کي له نفتي موادو پرته په نورو توکو د لېږد فورم اخیستل لغوه کړي وو او همدارنګه په تازه میوو، سبزیو، ټایرونو او امریکایي بادامو باندي هم د لېږد فورم اخیستل لغوه سوي دي.
