د ګمرکونو لوی ریاست په اداري ناسته کي د ګمرکي اسانتیاوو پر رامنځته کولو خبري وسوې!
د غويي ۲مه ۱۴۰۴هـ.ل
د مالیې وزارت د ګمرکونو لوی ریاست د (۱۴۰۴) کال لومړنۍ اداري ناسته د ګمرکونو لوی رئیس الحاج مولوي محمد حامد احمد په مشرۍ او د یاد ریاست د مرستیالانو، رئیسانو او آمرینو په ګډون د دغه ریاست په مقام کي وسوه.
په دې ناسته کي د صادراتي، وارداتي او ټرانزيټي توکو په ګمرکي طی مراحلو کي پر موجودو ستونزو او حل لارو، د ګمرکي تعرفوي کوډونو پر اصلاح، د ګمرکونو لوی ریاست پر پراختیایي پروژو، د یاد ریاست د مرکزي او ولایتي ادارو د ورځنیو چارو پر لا ښه والي، په ګمرکونو کي د یو شمېر سوداګریزو شرکتونو او صنعتکارانو د غوښتنو او ستونزو پر حلولو او یو شمېر نورو موضوعاتو خبري وسوې او په تړاو ئې لازم تصامیم ونیول سول.
د یادولو ده، چي د مالیې وزارت تل هڅه کوي، چي د هیواد په ګمرکونو کي د کورنیو او بهرنیو سوداګرو له پاره لا ډېري اسانتیاوي برابري او د ملي سوداګرۍ لا پراخولو ته ښه زمینه برابره کړي.
