د ګمرکونو لوی رئیس د بلخ له والي سره وکتل!
د تلي ۶مه ۱۴۰۴هـ.ل
د مالیې وزارت د ګمرکونو لوی رئیس الحاج مولوي محمد حامد احمد، چي په رسمي سفر بلخ ولایت ته تللی وو، د یاد ولایت په مقام کي ئې د بلخ له والي الحاج ملا محمد یوسف وفا سره ولیدل.
په دې لیدنه کي دواړو لوریو سوداګرو ته د لا زیاتو اسانتیاوو پر برابرولو او د دوی د ستونزو پر حلولو، په هیواد کي د سوداګرۍ پر ودي، د ګمرکي عوایدو پر لا زیاتولو او یو شمېر نورو موضوعاتو بحث او خبري وکړې.
همداشان د ګمرکونو لوی رئیس په دې سفر کي عبدالحکیم (شمس الحق)، چي د مالیې وزارت په وړاندیز او ا.ا.ا د ریاست الوزراء عالي مقام په منظورۍ د بلخ ګمرک د رئیس په توګه ټاکل سوی وو د یاد ګمرک کارکوونکو ته ور وپېژانده.
نوموړي د بلخ ګمرک د پخواني رئیس مولوي محمد عبدالله بلال له ترسره سویو کړنو او فعالیتونو څخه مننه وکړه او نوي ټاکل سوي رئیس ته ئې په چارو کي د بریالیتوب هیله وکړه. د ګمرکونو لوی رئیس د بلخ ګمرک کارکوونکو ته سپارښتنه وکړه، چي له نوي ټاکل سوي رئیس سره هر اړخیزه همکاري وکړي.
د یادوني وړ ده، چي عبدالحکیم (شمس الحق) په ګمرکي چارو کي پوره کاري تجربه لري او تر دې وړاندي ئې د فراه، نیمروز او کابل ګمرک د رئیس په توګه هم دندي ترسره کړي دي.
