د ګمرکونو او عوایدو معینیت د اړوندو ریاستونو تر منځ د همغږۍ ناسته وسوه!
د چنګاښ لومړۍ ۱۴۰۴هـ.ل
د مالیې وزارت د ګمرکونو او عوایدو معین الحاج مفتي عبدالمتین سعید په مشرۍ د ګمرکونو او عوایدو معینیت د اړوندو ریاستونو تر منځ د (۱۴۰۴هـ.ل) کال د همغږۍ درېیمه ناسته د یاد معینیت د غونډو په تالار کي وسوه.
په دې ناسته کي، چي د اړوندو ریاستونو مسئولینو ګډون کړی وو، په پیل کي د ګمرکونو او عوایدو معین خبري وکړې او وئې ویل، چي د همغږۍ ناستي پرېکړي باید پر خپل وخت سره پلي سي او پایلي ئې هم د ناستي له ګډونوالو سره شریکي سي. ور پسې د تېري ناستي د پرېکړو په اړه بحث او خبري وسوې او د ټاکل سویو پلاوو راپورنه واورېدل سول.
همدارنګه په دې ناسته کي په ګمرکونو کي د کارکوونکو له لوري د اسیکوډا په سیسټم کي د جوړو سویو یوزرونو په کارولو، د خامو نفتو د وارداتو په برخه کي پر سته ستونزو او حل لارو، د سوداګریزو شرکتو او صنعتي فابریکو د مالیاتو د تصفیې او ګمرکي دَین په برخه کي د ګمرکونو او عوایدو لویو ریاستونو تر منځ د هغمږۍ پر زیاتوالي او یو شمېر نورو اړینو موضوعاتو په تړاو بحث او لازمي پرېکړي وسوې.
د یادوني وړ ده، چي د ګمرکونو او عوایدو معینیت د اړوندو ریاستونو ترمنځ دغه ناستي د ګډو همکاریو د پیاوړتیا په موخه جوړېږي، چي په راتلونکي کي به هم دوام وکړي.
